नेपाली हास्यव्यङ्ग्य अनलाइन पत्रिका

शिवप्रसाद जैशी :

कहाँ जन्मिएँ म
सुन्दर हिमाल पहाड
अनि तराईको सङ्गममा
असङ्ख्य देवाधिदेवको धाममा
पानीका मुहान अनि घाममा
जल जङ्गल र छहरामा
रूबी र मणिका पहरामा
ठ्याक्कै देशमा जन्मिएँ म ।

दोषीलाई माला लाउने
दोषीभन्दा नारा लाउने
कुकर्मीलाई माला लाउने
अधर्मीलाई खादा लाउने
स्वकर्मीलाई डाँडा कटाउने
स्वाभिमान विदेश पठाउने
ठ्याक्कै देशमा जन्मिएँ म ।

निर्दोषीलाई लोर्प्याउने
इमान्दारलाई घोर्क्याउने
स्वदेशी श्रमलाई लल्कार्ने
विदेशमा त्यही फट्कार्ने
देश छोड्ने
विदेश रोज्ने
ठ्याक्कै देशमा जन्मिएँ म ।

न्यायाधीश आफै बन्ने
न्याय निसाफ आफै गर्ने
आफू न्यायी
अरु सबै अन्यायी
अरुको फैसला मान्दैनौँ
हाम्रो फैसला मान्नै पर्छ
ठ्याक्कै देशमा जन्मिएँ म ।

म पक्का
अरु कच्चा
म खास्सा
अरु वादशाह
मैले भनेको हुने
अरुले भनेको नहुने
ठ्याक्कै देशमा जन्मिएँ म ।

विवेक बन्धकीमा
ध्यान भक्तिभावमा
अघिलग्गु हुन्न
पछिलग्गु छोडिन्न
आरती उतार्ने
जिब्रो फट्कार्ने
ठ्याक्कै देशमा जन्मिएँ म ।

०००
काठमाडौं