नेपाली हास्यव्यङ्ग्य अनलाइन पत्रिका

कमला पन्थी :

घण्टीको पनि छैन तागत यहाँ रालो त खस्दै गयो
बज्नै मुस्किल पो भयो अब हरे घण्टी बन्यो निम्छरो
गर्थे काम कुरा अथाह कति हुन् निर्धक्क हामी थियौँ
केही हुन्छ भनेर ढुक्कसँगले आशा गरेका थियौँ । १ ।

आशादीप बनेर झुल्किन गयौ घन्टी बजाई हिड्यौ
“हो हो“ मात्र भनेर मन्दिर पुग्यौँ आवाज सुन्दै रह्यौँ
भित्री काम कुरा अथाह कति हुन् के बुझ्नु हामी पनि
ऐले बल्ल कुरा खुली अघि बढ्यो आगो बल्यो दन्दनी । २ ।

जे देख्छौँ जनले कुनै छ गतिलो विश्वासिलो आँटिलो
के बुझ्थ्यौँ बिचरा कठै अधमरा भित्री कुराको चुरो
साँचो के छ कुरा कहाँ र कसरी दर्वार तर्वारका
थाहा नै नहुने रहेछ जहिले ठूला बडाका कुरा । ३ ।

भित्री दाँत कडा परन्तु जहिले मुस्कान मीठो हुने
चिल्लावात गरेर हिड्न सकिने राम्रो कला झल्किने
यस्तै चाल सधैँ भयो भइरह्यो जे तन्त्र आऊन् यहाँ
आशा लाग्छ परन्तु पूर्ण नहुने बानी भयो सर्वदा ।४ ।

०००
काठमाडौं