नेपाली हास्यव्यङ्ग्य अनलाइन पत्रिका

कलानिधि दाहाल :

ममा मलाई कति छैन बाधा
म सिर्जनामा छु उताल प्याधा !
छ दृश्यको धार धरा धमाका
सबै यता छन् किन कोर्नु खाका ??

अदृश्यको धार अनन्तभित्र
लिएर झुम्ने मनभित्र चित्र !
अजीवको जीवन रङ्गरूप
धरा विराट्को म छु यो स्वरूप !!

बनूँ म नै रङ्ग सहस्र गाढा
घुसाउँदै दृश्य बनेर साँढा !
म सामु हेर्ने सबबाट टाढा
नवीन हूँ एक अजीव गाढा !!

बनौँ बनौँझैँ म अपार पार
खिचूँ दुवै लोक मिसेर सार !
मभित्र मेरो म सधैँ रहूँ म
हुने पुराना सब दूर हूँ म !!

न खानको भोक भरी बसूँ म
न स्वाङ छाना छतमा घसूँ म !
न आङका वस्त्र म आँसु झारूँ
सब‌ै भगाई सृजना उतारूँ !!

हटूँ म हाँसो पनि हुन्न केही
हटूँ म नासो पनि हुन्न केही !
लिऊँ म पासो अझ हुन्न केही
समाधि साधा सब ढङ्ग केही !!

नदी बगेझैँ म बगूँ सबेर
नितान्त नौलो नव धारनेर !
तरङ्ग तैरूँ म तमाम रङ्ग
समग्रको अङ्ग बनूँ म ढङ्ग !!

विशाल ल्याऊँ मनका कुनामा
रहे भगाऊँ भय यी दुनामा !
बनेर निर्भीक म राज्य छाडूँ
समग्रका सोच सदैव बाँडूँ !!

र देशको भक्ति सधैँ भगाऊँ
जुरुक्क उठ्ने जग यो जगाऊँ !
उदारका द्वार सबै खुलाऊँ
उदात्तमा सिर्जन गुल्गुलाऊँ !!

०००
कलेकुटी, काठमाडाैं