नेपाली हास्यव्यङ्ग्य अनलाइन पत्रिका

डा. बमबहादुर थापा ‘जिताली’ :

छाडा भए देशभाँडा कल्ले बोल्न सक्ने ?
रत्यौलीको स्वतन्त्रता कल्ले रोक्न सक्ने ?
गाई-जात्राभन्दा ठूलो जात्रा चल्यो ऐले
देखेँ हलो-गोरुजात्रा, महाजात्रा मैले ।

ठेउवा, कौवा रतेलीमा गीत गाउने भए
पखेटा नै उचालेर डिस्को नाची गए
बाज आयो हानिएर आँखा नचाउँदै
श्याल, कुकुर, गिद्ध हाँसे सिनु चपाउँदै ।

बाँदरको हात पर्‍यो डल्ले नरिबल
बिरालो र बाघहरू गरे खलबल
टाठा-बाठा बलियाले मोज गर्न पाए
लाटा-सुधा जनताले खानु दुःख खाए ।

जोजो आए खाए गए काम कल्ले गर्‍यो ?
जल्ले पनि मौका पारी आफ्नै भुँडी भर्‍यो
जल्ले पायो डाडु-पन्यु उल्ले खायो धेरै
सीधा-सादाहरू चाहिँ सधैं हेर्‍याहेर्‍यै ।

राती चल्ने रत्यौली त दिन घोडेजात्रा
कतिञ्जेल चल्ने होला यस्तो गाई-जात्रा ?
रत्यौली र गाईजात्रामा हुन्छ ठूलो भोज
जति जात्रा चल्यो उति नेता गर्छन् मोज ।

०००
लमजुङ
फित्कौली, पूर्णाङ्क ५, २०६२