नेपाली हास्यव्यङ्ग्य अनलाइन पत्रिका

भतिजा-भतिजी साला-साली
बहिनी-ज्वाइँ ससुरा माली ।
जागिर ठेक्का पायक पारी
जन्तर थोत्रो उही विहारी ॥१॥

सरुवा बढुवा गर्छु भन्दै
ठेक्कापट्टा भनसुन जप्दै ।
ब्रोकर झरिलो जोकर घतिलो
ज्यान लिएछौ कतिको कतिको ॥२॥

लोकतन्त्रको चम्बू भाइरस
भोकतन्त्रमा साक्षत् शाहीरस ।
चाकडी भर्दै चुक्ली कस्दै
घुम्छ केन्द्रमा खरानी घस्दै ॥३॥

खुराफातमा रम्दछ डाँका
मान्छेपिच्छे फेर्दछ भाका ।
व्यभिचारी यो भ्रष्टाचारी
आफैँ धामी बोक्सी मदारी ॥४॥

जब्बर आफू सामन्ती छ
मुटुमा छुरा मुखमा राम छ ।
गणको तन्त्र बोली मात्र
मनमा जङ्गी हिट्लर पात्र ॥५॥

चुस्ने लुट्ने नौला सूत्र
शब्दजालका भ्रष्ट कुपुत्र ।
माइला ठकुरी पथका अगुवा
छोटे राजा सत्ता-चखुवा ॥६॥

राणाहरूकै प्रतिकृति ठूला
जनतन्त्रमा औधी लुला ।
भाषण आसन रासन पाए
संझौतामा मसी सुकाए ॥७॥

सोझा निमुखा जनतामार
संविधान सभा पर-पर सार ।
हिलो छ्याप्दै ढुकुटी लुट्दै
टुट्दै जुट्दै नाटक उस्तै ॥८॥

नारानहिटी बलियो पार
दिल्लीलाई सिरमा राख ।
कुहिरा नेप्टा हात मिलाऊ
देश विनिर्माणको भोटो सिलाऊ ॥९॥

वण्ड अखण्ड राख प्रचण्ड
गिर्जा माधू बोक घमण्ड ।
विस्मृति पथका बटुवाहरु हो !
लोकतन्त्रका घटुवा अरु को ? ॥१०॥

ढीलासुस्ती जनता ढाँट
आउँछ उस्तै शाही ठाँट ।
दर्शन तोडी छोडी जनता
मार्दैछौ रे गरीब ममता ॥११॥

०००
फित्कौली, अङ्क १५, भदाै २०६४