नेपाली हास्यव्यङ्ग्य अनलाइन पत्रिका

ईश्वर पोखरेल :

मसँग एउटा खाम छ
त्यसमा हजुरको नाम छ
ठूला मान्छेको पत्र हो यो
गर्नै पर्ने एउटा काम छ
हाकिम सा’ब सलाम छ ।

चारपासका दिव्यज्ञानले
घुम्ने कुर्सीमा बस्ने गरेका
पहुँचवालाको धाक जमाई
विकास बजेट डस्ने गरेका
चिल्ला चिप्ला हर्पे बोकी
ठालुहरूकहाँ पस्ने गरेका
हजुरको ठूलो नाम छ
गर्नै पर्ने एउटा काम छ
हाकिम सा’ब सलाम छ ।

केबल हजुरको कृपा दृष्टिले
पर्ती जग्गामा महल ठडिन्छन्‌
मात्र हजुरको ‘दयादृष्टि’ले
सोझा सिधाका जरा खनिन्छन्‌
विचित्रको छ दृष्टि हजुरको
पैसा पाए सबै ‘मिल्ने’ देखिन्छन्‌
मेरो गोजीमा दाम छ
गर्नै पर्ने एउटा काम छ
हाकिम सा’ब सलाम छ ।

तस्करसंगको दोस्ती हजुरको
कहिल्यै पनि यो टुट्नु हुँदैन
लिने पचाउने ग्याङ्ग हजुरको
ग्याङ्ग कहिल्यै फुट्नृ हुँदैन
तक्मा पाउने नामावलीमा
कहिल्यै हजुरले छुट्नु हुँदैन
चाकडीदारको लाम छ
गर्नै पर्ने एउटा काम छ
हाकिम सा’ब सलाम छ ।

घुस नखाने सिधासाधाको
बचरा लुक्ने गुँड भएन
घुस नआउने फाइल पल्टाउन
कहिल्यै हजुरको ‘मुड’ भएन
भुँडे गणेशको साख्खे भतिजो
केबल हजुरको सुँड भएन
गिदी हजुरको ‘जाम’ छ
गर्नै पर्ने एउटा काम छ
हाकिम सा’ब सलाम छ ।

०००
बोझेपोखरी, ललितपुर
‘गोरखापत्र’ (२०४७ साउन २३)