लीला उदासीउनीहरू ऐना हेर्दैनन्
स्वाधीनताको विरुद्धमा स्वाभिमानको विरुद्धमा उनीहरू ताली ठोक्छन् र बाली बोक्छन् उनीहरू सत्य र ऐनाका विरुद्धमा बोल्छन् मनका विरद्धमा बोल्छन् तर उनीहरू ऐना हेर्दैनन् ।
लीला उदासी :
उनीहरूले आफ्ना बारेमा धेरै कुरा बताए
केहीले त पत्याए
धेरैले पत्याएनन्
तर नपत्याउनेले
नपत्याएको भनेनन्
केहीले ऐना हेर्न भने
तर उनले ऐना हेरेनन् ।
हो‚ उनीहरू ऐना हेर्दैनन्
आफूले बताएको आफ्नै कुरा ऐनामा मिल्दैन
ऐनाको उनलाई विश्वास छैन
उनलाई लाग्छ –
ऐना उनको अनुहार देखाउने क्षमतामा छैन
उनलाई ऐना धोका जस्तै लाग्छ
त्यसैले उनीहरू ऐना हेर्दैनन् ।
उनीहरूलाई सत्य मन पर्दैन
सत्ता प्रिय लाग्छ
उनलाई राम्रो थाहा छ
सत्य र सत्ता सँगै हुँदैन
सत्य उनलाई मन पर्दैन
त्यसैले उनलाई ऐना मन पर्दैन
उनीहरू ऐना हेर्दैनन् ।
सत्ताको त जग‚ चर र छत पनि
झूटै झूटको हुन्छ
झूट आफ्नै विरुद्धमा पनि हुन्छ
झूट मनकै विरुद्धमा पनि हुन्छ
स्वाधीनताको विरुद्धमा
स्वाभिमानको विरुद्धमा
उनीहरू ताली ठोक्छन्
र बाली बोक्छन्
उनीहरू सत्य र ऐनाका विरुद्धमा बोल्छन्
मनका विरद्धमा बोल्छन्
तर
उनीहरू ऐना हेर्दैनन् ।
०००
२०७९ असार १८
मेराे लिम्पियाधुरा (२०८०)
राम्रो