नेपाली हास्यव्यङ्ग्य अनलाइन पत्रिका

अन्जु शर्मा :

कहिले नेताको पाउ समाउँदै हिडें
कहिले दुःखेको घाउ समाउँदै हिडें
मान्छे बन्ने रहरमा कयौंपटक यहाँ
आँसु र पसिना एकै ठाउँ जमाउँदै हिडें।

बाको झुकेको शिर उठाउँन हिडें
आमाको फाटेको फरिया सिलाउँन हिडें
हातमा कोदालो र थाप्लोमा नाम्लो भिरेर
हतारिदै प्यारीको सिउँदो सजाउँन हिडें।

छोराको फिस भर्नलाई पार्टीको दलाल बनें
छोरीको बिहे गर्नलाई स्वाभिमानको हलाल गरें
दुइ छाक रोटी जोहो गर्नकै लागि हजुर
ती फरार अभियुक्तको म जल्लाद बनें।

कर्मचारी बनी हिंडें भ्रष्टाचारी भने
राजनीति गरि हिंडें गद्दारी भने
त्यसैले पेसा नगरी घरमै बसें
स्वास्नीको कमाइ खाने अत्यचारी भने।

त्यसैले,
मेरा सबै रहर छोटिएका छन्
जीवन जीउने कला रेटिएका छन्
धेरै लामो अनुभवले बताएको छ
मात्रै रोबोट बन्ने रहर जोडिएको छ।

०००
रातोपुल, काठमाडाैं
२०८१ वैशाख ३१