नेपाली हास्यव्यङ्ग्य अनलाइन पत्रिका

रमेश खकुरेल :

चुरा लगाऊ कविजी तिम्रा नारीमा
मिल्काउ तिम्रो त्यो कलम सिस्नोघारीमा ।

च्यैच्यै भन्दै पुरस्कारको पोको जल्ले दिन्छ
उतैतिर तिम्रो पाइला लुरुलुरु हिन्छ
रिवन लगाऊ कविजी घोर्ले दारीमा
मिल्काऊ तिम्रो त्यो कलम सिस्नोघारीमा ।

तरुनीका चिल्ला गाला काला कपाल देख्छौ
कम्मर् मर्काई हल्लाउनेको गीत कति लेख्छौ
विकिसके तिम्रा चेली मुग्लान् पारिमा
मिल्काऊ तिम्रो त्यो कलम सिस्नोघारीमा ।

भुँडीवालको डकार पनि कविता झै देख्छौ
जुठो पुरा आश गरी कति ज्यू ज्यू गर्छौं
भोका नाङ्गा छैनन् तिम्रो जिम्मेदारीमा
मिल्काऊ तिम्रो त्यो कलम सिस्नोघारीमा ।

खुकुरीमा खिया लाग्यो तातो रगत् सुक्यो
किन तिम्रो सगरमाथा लुरे बनी झुक्यो
वैरी पसी नाच्न थाल्यो तिम्रो बारीमा
मिल्काऊ तिम्रो त्यो कलम सिस्नोघारीमा ।

०००
गर्दभराग (२०५७)