नेपाली हास्यव्यङ्ग्य अनलाइन पत्रिका

बालकृष्ण खनाल :

छोडी धर्म गरेर युद्ध दिनकै, मार्छन् निहत्था जन।
कस्ले शान्ति भनेर सुन्दछ यहाँ , सोचेर आफै भन।।
जप्दै शान्ति सधै अशान्त मनले, मर्दैछ मान्छे बुझ।
बोकी आउ छिटो विलम्ब नगरी, हे बुद्ध बम् बन्दुक।।

काट्छन् फेँद उध्याइ खुकुरी, टुप्पा चढाइ कन
डाँका छन् सबका सबै मुलुकमा, भागे कहाँ सज्जन।।
सुन्छन् को रणमा लडाइँ लडने, मैदानका दानव।
बोकी आउ छिटो विलम्ब नगरी हे बुद्ध बम् बन्दुक।।

कोही भन्छ इशा ठुलो भुवनको, कोही महादेव हो।
होही भन्छ खुदा सबै जगतको, कल्याण गर्ने भयो।
बुझ्दैनन् जनले यहाँ हजुरको, भाषा अझै वैदिक।
बोकी आउ छिटो विलम्ब नगरी, हे बुद्ध बम् बन्दुक।।

भन्छन् रक्ष गरे जुधाइ जनता, जो धर्मका नाममा।
के हो धर्म भनेर नबुझी, मर्छन् बिना काममा।।
मान्दैनन् अब यी लडाइ नगरी, के बृद्ध के बालक।
बोकी आउ छिटो विलम्ब नगरी हे बुद्ध बम् बन्दुक।।

लड्नै पर्छ हुँदैन शान्ति नलडी अन्तीमको युद्ध जो।
रक्षा गर्न पर्‍यो छिटो हजुरले, मारेर पापीष्ट को।।
जप्दै नाम नमो सदा हजुरको, मान्छे भए चिन्तित।
बोकी आउ छिटो विलम्ब नगरी, हे बुद्ध बम् बन्दुक।।

०००
टिकापुर, कैलाली