नेपाली हास्यव्यङ्ग्य अनलाइन पत्रिका

माधव पोखरेल गोज्याङ्ग्रे :

हेर्दा राम्रो संसद भवन भित्र लुछाचुँडी
सधैँ जात्रा देखाउँछन गन्य मान्य भुँडी ।
गन्धे झोल संसदमा गन्हाउँछ ह्‌वास्स
बेथितिको चाङ देख्दा मुटु दुख्छ च्वास्स ।
हेर्दा राम्रो …

विपक्षीको तीखो बोली सम्झन्छु म झ्‌वास्स
तिनै सांसद निदाउँछन दिनैभरी फ्‌वास्स ।
नियम कानुन बनाउँदै छन् दफा चपाएर
अर्कोतिर खोस्टा फाल्छन आफैँ लजाएर ।
हेर्दा राम्रो …

आफू बस्ने कुर्सीहरु भाँचे बल गरी
देख्छु आजकल माननीय छिचिमिरा सरी ।
चोक्टा खान संसद पुगे झोलमा आफै डुबे
पाँच वर्षे खेती गर्दा जजनता सबै लुछे ।
हेर्दा राम्रो …

मधेशका मसिहा नि पिजरा भित्रै लुके
खुला आकाश देखाउने सपना मात्र भुके ।
अधिकार खोज्नेहरु लुक्छन कुना पसी
ठूला कुरा यिनकै हुन्छ भुक्छन बसी बसी ।
हेर्दा राम्रो …

संविधान खोस्टा सरी भन्छन घरी घरी
आफै धामी आफैँ बोक्सी बन्छन घरीघरी ।
जनादेश भष्माशेष कचौरा छ हातमा
मतदाता रुवाएर को को भए साथमा ।
हेर्दा राम्रो …

ताली खान पल्केका ती गाली मात्र खान्छन्
अब फेरी जाउन् गाउँ अगुल्टाले हान्छन् ।
घाँटी थिच जनताको उद्धार हुन्छ तिम्रो
विकृतिलाई जन्माउ छिटो नाम रहन्छ हाम्रो ।
हेर्दा राम्रो …

०००
उदयपुर