नेपाली हास्यव्यङ्ग्य अनलाइन पत्रिका

लक्ष्मण नेवटिया :

दूध दिएसम्म सबैका हुन्छौं प्यारा
खान पाउछौ मीठो मीठो आहारा।

निस्कदै मतलब-सडकमा लत्यायौ
झन नाम गर्छन् बदनाम – “छाडा”।

दुही राखेसम्म आह! क्या हरियो घाँस
पँखा जडान गरिएको सफासुघर वास ।

मानिस त जातैले भएर स्वार्थको दास
अहिले सडकबीच बस्नु पर्छ उपवास।।

पसलेले हामीलाई देख्दै अन्न लुकाउँछ
ठड्याएर लौरो पसल सामु झुक्याउँछ

तर गर्ने के? जब यो पापीपेटले सताउँछ
लठी खाएर पनि मुखले तानेर पुर्‍याउँछ।

बिग्रेर हामीलाई बिगार्नेहरूको मति
सडकमा लगेर छाड्ने गर्छन् सहमति

उम्रेर यिनमा स्वार्थमयी पापी प्रवृति
दैविक गौधनको हरे ! कस्तो दुर्गति ??

०००
विराटनगर