मिलन समीरमतो
आत्मविश्वासको "अ" नै नभएकाहरुले आफ्ना झिनामसिना कुरालाई लिएर अरुलाई मतोमा लगिरहेका हुन्छन् आफ्नै आत्मालाई ठगिरहेका हुन्छन् मूलबाटोमै बसेर हगिरहेका हुन्छन् !
मिलन समीर :
यता हेर्यो यतै मतो बसिरहेका छन्
उता हेर्यो उतै मतो बसिरहेका छन्
त्यता हेर्यो त्यतै मतो बसिरहेका छन् !
तल हेर्यो तलै मतो बसिरहेका छन्
माथि हेर्यो माथि मतो बसिरहेका छन् !
दायाँ हेर्यो यहाँ पनि मतो बसिरहेका छन्
बायाँ हेर्यो त्यहाँ पनि मतो बसिरहेका छन् !
उहिलेदेखिकै यस्तो मतोमय माहोलमा
पुरै चुहिने नै भए तापनि
आफ्नो दुनो सधैं सोझ्याउन पल्किरहेकाहरु प्रायः
जता हेर्यो त्यतै मतो बसिरहेका छन् !
एउटाले अर्कोलाई लिएर मतो बसिरहेको छ
अर्कोले फेरि अर्कोलाई लिएर मतो बसिरहेको छ !
दुईजनाको ठाउँमा तीन जना मात्रै के भेटिएका हुन्छन्
पहिलोले दोस्रोलाई मतोमा लिएर गइसकेको हुन्छ
दोस्रोलाई तेस्रोसँग मतो बस्ने हतार भइसकेको हुन्छ !
कोही जीवनकै टोपी खस्ने
घनघस्याको उकालोमा
मतो बसिरहेका छन्
कोही जीवनकै खुट्टा काम्ने
आँधीखोले ओरालोमा
मतो बसिरहेका छन् !
नैतिक बलसहितको
आत्मविश्वास भएकाहरुले
आफ्नो जुनसुकै कुरालाई पनि
बकाइदाकासाथ सबैका अगाडि
जस्ताको तस्तै राखिरहेका हुन्छन्
अस्तित्वसहित बाँकि रहेका हुन्छन्
र त शानदार जीवन बाँचिरहेका हुन्छन् ।
आफ्नो कुरोको चुरो बुझाएर
छलफललाई अन्तिम निष्कर्षमा
पुर्याउने काम गरिरहेका हुन्छन्
खाली ठाउँ पुरै भरिरहेका हुन्छन्
आफ्नो सुवास छरिरहेका हुन्छन् ।
आत्मविश्वासको “अ” नै नभएकाहरुले
आफ्ना झिनामसिना कुरालाई लिएर
अरुलाई मतोमा लगिरहेका हुन्छन्
आफ्नै आत्मालाई ठगिरहेका हुन्छन्
मूलबाटोमै बसेर हगिरहेका हुन्छन् !
सधैंभरि … यसैगरी … उनीहरू
अरु कसैको अदृश्य इशारामा
संवेदनशील समयको बाढीमा हेलिएर
प्रतिकुल परिस्थितिको पहिरोसँगै
अदृश्य रुपमा बगिरहेका हुन्छन्
र दृश्य रूपमा अघि रहेका हुन्छन् ।
०००
करादीखोला, स्याङ्जा
मतोमय मतो