नेपाली हास्यव्यङ्ग्य अनलाइन पत्रिका

बालकृष्ण खनाल :

चाहन्थे जनता नयाँ किसमको, त्यो राज्य शत्ता यहाँ
फेरिन्छन् अनुहार मात्र जनका, फेरिन्न शासन जहाँ ।
राणा शासन फाल्दछौँ भनि मरे, पुर्खाहरूले जहाँ
उनकै शासन चल्छ आज सममा, योदेश नेपालमा।।१

फेरिन्छन् मसिना किरा र कमिला, फेरिन्न शासन कबै
भन्छन् फेर्न परेछ इन्जन सबै, उस्तै छ इन्जन अझै ।
कस्को हैकम चल्छ यो मुलुकमा, को रैछ साँडे यहाँ
शंकम लाग्छ मलाइ यो मनमनै, नेताहरूका जहाँ।।२

बन्छन् मित्र चुनावको समयमा, भन्छन् समस्या छ के ?
दिन्छौ भोट भने अभाव सबको, गर्नेछु पुर्ती छ जे ।
बन्छन् राम समान रावणहरू, गर्छन् मिठा भाषण
झुक्याए जनता म राम हुँ भनी, रैछन् यिनी रावण।।३

हाल्यौँ भोट चुनावमा घरिघरी, राम्रा यिनै छन् भनी
गर्छन् शासन यी निरङ्कुश अझै, राजा रजौटा बनी ।
सुध्री आउ चुनावमा अब तिमी, पर्दा उघारी कन
कालो दाग छ जो निधार तटमा, धोई पखालीकन।।४

अर्को छैन विकल्प यो मुलुकमा, यो तन्त्र भन्दा अरू
नेता औ जनता मिलेर सबले,र क्षा यसैको गरुँ।
राम्रो हो गणतन्त्र राजनीतिमा नेता गतिला भए
सारा तन्त्र अरू अफाप हुनगै, संसारबाटै गए।।५

०००
टिकापुर, कैलाली