नेपाली हास्यव्यङ्ग्य अनलाइन पत्रिका

डा. बमबहादुर थापा ‘जिताली’ :

चोरलाई चौतारो छ साधुलाई सुली
भनेजस्तो भएको छ युवालाई गोली ।
हिजो थियो शान्तिक्षेत्र आज कुरुक्षेत्र
अपराधी केन्द्र बन्यो राजनीति–क्षेत्र ॥

रोजगारी यतै थियो गयो देशपारि
युवाहरू गोता खान्छन् खोजी रोजगारी ।
धर्म थियो भकारीमा सनातनी साझा
कर्म थियो मुलुकमा किसानीको ताजा ॥

हिजो थियो कताकतै कौटिल्यको नीति
आज आयो जताततै वेथितिको नीति ।
नीतिसिति यत्रैसिति भन्न थाले मन्त्री
भद्रगोल पार्न थाले खाँटी गणतन्त्री ॥

केटाकेटी खेलेजस्तो खेल खेल्छन् नाइके
ख्यालठट्टा गरेजस्तो बोली बोल्छन् टाउके ।
बोलेपछि हुन्थ्यो हिजो रामवाणसरि
आज जेजे बोले पनि हुन्छ मनपरी ॥

राष्ट्रनीति बनेको छ भागबण्डा भारी
निषेदको नीति बन्यो आलोपालेधारी ।
हिजो आन्थ्यो कोरियामा नेपालको धान
आज युवा मरेका छन् कोरियामा जान ॥

बेसाएर कतिञ्जेल खाने ।
अन्नबाली हरायो रैथाने ॥

०००
नागार्जुन न.पा.–१, रानीवन, काठमाडौँ
९८४१४९१०८१