नेपाली हास्यव्यङ्ग्य अनलाइन पत्रिका

गायत्री लम्साल :

आहा मस्ति छौँ हामी,
फेरि पनि
उही माले गोरु
ब्याएको उन्मुक्त उपलक्ष्यमा
घाँस कुँडो पकाएर ख्याएका छौँ ।
उसको सुत्केरो ज्यान जोगाउन
तेलमा मेथी फुराएर
घसेका छाँै ।
दशै दिशाबाट उसलाई
बधाई र शुभकामनाको
ओइरो चलेको छ ।
कठै हामी बिचरा
जसले जति सक्छौँ,
सुत्केरो मसलाको
पहिरो चलेको छ ॥

अब क्रमश….
तारे गोरु ब्याउँछ
घण्टे गोरु ब्याउँछ
अरु सबै, नयाँ नयाँ नामका
नयाँ नयाँ कामका गोरु ब्याउने
त्यही दिनको प्रतिक्षामा छौँ हामी
जब सबै गोरु ब्याएर सकिन्छ
तब,
तिनै गोरुको लौनो दुःध बेचेर
घरको समृद्धि, मनको समृद्धि, देशको समृद्धि
अनि संविधानका सबै धाराहरुमा
आमूल परिवर्तन आउनेछ,
समग्र नेपालीको मन र मस्तिष्कमा
सुखशान्ति र अमनचयन छाउनेछ ॥

०००
स्याङ्जा