नेपाली हास्यव्यङ्ग्य अनलाइन पत्रिका

रामशरण न्यौपाने “पाँचघरे” :

उद्योगी हुन बाट रोक दुनियाँ लादेर भारी कर
सारा वस्तु विदेशबाट महँगो आयात गर्ने गर
ह्याकुल्लो र फिलो बनाउन बिलो हानेर एकै शर
सम्झी देश बिलो भुटीकन फिलो घ्याम्पे भुँडी त्यो भर॥१

माया नै न त देशको छ जनको छाती छ त्यो जर्जर
राँकेभूत बनेर यो मुलुकमा लौ नाच नाङ्गो गर
आयुर्दा बलियो छ वायुसित पो के मान्दछौ खै डर?
सम्झी देश बिलो भुटीकन फिलो घ्याम्पे भुँडी त्यो भर॥२

लाग्छन् पाद सुँघेर नै पछि यहाँ ती कार्यकर्ताहरू
बन्छन् रक्षक न्यायमूर्ति सहजै बोल्ने यहाँ को अरू?
पैसामा नबिकेर शुद्ध रहने मान्छे यहाँ को छ र?
सम्झी देश बिलो भुटीकन फिलो घ्याम्पे भुँडी त्यो भर॥३

उम्दा वैभवका तथा नगदका भण्डार भित्रै पस
सारा स्रोत अगस्तिले जलधिझैँ सोस्ने गरी साहस
हाली काँध नचाउँछन् र अझ खा भन्छन् यहाँका नर
सम्झी देश बिलो भुटीकन फिलो घ्याम्पे भुँडी त्यो भर॥४

जस्ले देश बनाउने प्रण गरे खेदो तिनैको खन
राणाशासनको दिँदै झलक त्यो जङ्गे तिमी नै बन
जो छन् सभ्य र दक्ष यो मुलुकका सारा युवा हुन् पर
सम्झी देश बिलो भुटीकन फिलो घ्याम्पे भुँडी त्यो भर॥५

०००
चा. ना. पा.३ दुबुलाँपू, भक्तपुर