नेपाली हास्यव्यङ्ग्य अनलाइन पत्रिका

बिन्दु दहाल मूकदर्शक :

कुरा ठुला ठुला गर्छ चोकमा
युवा भेला गरेर गफ चुट्छ
तर ऊ घरमा सिन्को भाँच्दैन
सधैँ ढाट्छ र जता पनि ठिक्क हुन्छ
भएका नभएका कुरा जोडेर गफ चुट्छ
आफ्नै मपाइँत्वमा बाँचेको छ
अरूलाई रुवाएर हाँसेको छ
किनभने ऊ प्रगतिशील हो ।

ऊ न कविता निबन्ध लेख्छ
न गजल मुक्तक लेख्छ
न कथा उपन्यास, समालोचना नै लेख्छ
बरु अरूको लेख सिर्जनालाई
उल्टै फिस्स हाँसेर
चुरोटको धुँवा झैँ उडाइदिन्छ
उसैलाई कुर्सी र पद चाहिन्छ
किन भने ऊ प्रगतिशील हो ।

उसको राशी कन्या हो
त्यसैको खोजीमा मरिमेट्छ
घरमा श्रीमतीलाई बधुवा मजदुर बनाएको छ
बाहिर निस्किन दिँदैन
घाँसदाउरा र चुलाचौकामा सीमित बनाएको छ
छोराछोरीलाई बोल्न दिँदैन , सातो खान्छ
राति अबेर घर आउँछ लर्बराउँदै
र ताण्डव नृत्य देखाउँछ
किनभने ऊ प्रगतिशील हो ।

धर्म संस्कार मान्दैन
श्राद्ध पूजा गर्दैन
नम्र भाषा बोल्दैन
पैसा भेटी जस्तो पनि छोड्दैन
मिठोमिठो खान चाहिन्छ
राम्रो राम्रो लाउन खोज्छ
बिहानभरि सुत्छ
नौ बजेतिर उठ्छ
सधैँ आडम्बरमा बाँचेको छ
किनभने ऊ प्रगतिशील हो ।

०००
दमक, झापा