नेपाली हास्यव्यङ्ग्य अनलाइन पत्रिका

फोक्सो–जिब्रो कलेजो, मुटु अझ किटनी, घोर मस्तिष्कघात
बेर्नू निस्केर धेरै, गलित थकित छौ, सुन्निदै पाद– हात ।
के गर्छौ राज तिम्ले ? तन मन सब नै, छैन ठेगान नेता
टाढाका देश पुग्छौ, मुलुक–धन लुटी, ओखतीकै छ चिन्ता ।।१।।

झाडाबान्ता चलेरै, कतिकति जनता ओखती नै नपाई
आँखा चिम्लेर जान्छन्, यमपुर अगुवा, गर्दछन बाइबाइ ।
तिन्कै पैसा बटुल्दै, हङकङ पुर वा, अम्रिका थाइल्यान्ड
निको बन्ने मुरादा, मुलुक धन लियौ, देश नै लूटल्यान्ड ।।२।।

राणा वा शाह राजा, जनधन लुटुवा, दुस्ट सामन्त जस्ता
देखिन्छौ लुव्ध नेता, अधम तम बढ्यो, छैन के लोक लज्जा ?
रोगी भोगी र क्रोधी, सबतिर अगुवा, बन्छ के संविधान ?
धर्तीकै भारजस्ता, दनुज–पशु भए, बन्छ के संविधान ? ।।३।।

धादिङ