हाम्रो काठमाडौंमा
आँसु रैछ हाँसो रैछ, हाम्रो काठमाडौंमा
धूलो, मैलो, ध्वाँसो रैछ, हाम्रो काठमाडौंमा ।
अर्कालाई खसालेर, कुरा काट्छन् सधैं
अनावश्यक चासो रैछ, हाम्रो काठमाडौंमा ।
कतै देखें पीडा मात्रै, कतै छत्तोखेलो
कतै गलपासो रैछ, हाम्रो काठमाडौंमा ।
कता कता हराएछन्, आदिबासी मान्छे
नयाँ रासोबासो रैछ, हाम्रो काठमाडौंमा ।
थोत्रा थाम्रा चिथडाले, भरिएछ टन्नै
जताततै गाँसो रैछ, हाम्रो काठमाडौंमा ।
सास्ती दिँदै पछि लागे, बाधा अड्चन धेरै
दुखै मात्र टाँसो रैछ, हाम्रो काठमाडौंमा ।
बाँच्न सहज छैन यहाँ, अभावले डस्दा
जिन्दगी नै नासो रैछ, हाम्रो काठमाडौंमा ।
सुशान्तिको बाटो कुर्दै, थाकेका छन् सबै
व्यक्ति व्यक्ति प्यासो रैछ, हाम्रो काठमाडौंमा
पुरानो नैकाप, काठमाडौं
हाल : रोचेस्टर, न्युयोर्क