नेपाली हास्यव्यङ्ग्य अनलाइन पत्रिका

यता सुशील बिरामी छन् उता ओली बिरामी छन्
सत्ताका यी साझेदार भरे कि भोलि भाका छन्
विदेशै यी किन जान्छन् उपचार गर्नलाई ?
स्वदेशमा कसले पो सक्छ यी दुईलाइ ठीक पार्नलाई ?

हरेक अस्पतालको लाईसेन्समा कसैले घुस खा’को छ
डाक्टर नर्सको कलेजलाई सबैले भाग ला’को छ
हरेक नक्कली डाक्टर कुनै दलको भा’को छ
नक्कली औषधि हेरी ककसले के के खा’को छ
प्रपन्च त्यो सबै बुझ्ने नेता मात्रै विदेश गा’छ
नबुझ्ने यो नेपालीको उपचार यहिँ भा’छ ।

नेपालीले विदेश जानु कुनै ठुलो कुरा होइन
उताबाट बाकसभित्र सुति आउनु नयाँ होइन
नेता जान्छन् उभिएरै उभिएरै किन आउँछन् ?
गुनासो त्यत्ति मात्रै हो अरु आशा कुनै होइन ।

विदेशीनै नभई हुन्न नेपाली नेता ठिक पार्न
नेपालीले नेपालीलाई नत्र के सक्छ र मार्न ?

यता सुशील बिरामी छन् उता ओली बिरामी छन्
इन्जेक्सन जति देशमा तरकारीले पाका छन्
त्यो इन्जेक्सन नेतालाइ दिए उनकै सरिर बढ्थ्यो
देशै भित्र ठुला हुन्थे किन जानै विदेश पथ्र्यो ?

विदेश भन्दा नेपालमा नै औषधि ता धेरै हुन्छ
त्यसैले त हेरक खानेकुरा हेर्दा सफा हुन्छ
त्यही औषधि यी नेतालाई दिए नेता सफा हुन्छ
यो देशको रोग बिसेक हुन्छ तपाई हाम्लाई नाफा हुन्छ ।

बत्तिसपुतली, काठमाडौं