नेपाली हास्यव्यङ्ग्य अनलाइन पत्रिका

नयाँ नेपालको नयाँ खाका
नयाँ तिथि नयाँ भाका
तिमीले भनेकी थियौ
हामी देशको मालिक
बन्न पाउनुपर्छ
के छ माल्दाइ !
हुम्म पर्दै कता ?
भन्न पाउनुपर्छ
तिमीले भनेकी थियौ
स्वतन्त्र दुईछाक माम
कमाउन पाउनुपर्छ
अनि नयाँ नेपालमा
रमाउन पाउनुपर्छ ।

तर देख्यौ त !
कसरी तिमीलाई
लोप्पा ख्वाइदिए
काइते बुद्धि हुनेहरूले !
कसरी तिमीलाई
काखी बजाइदिए
चरित्र शुद्धि गर्नुपर्नेहरूले !
आऊ अब
हामी पनि जागौँ
र यही अभियानमा लागौँ
सहयोग गरौँ भुँडेहरूलाई
नयाँ नेपाल बनाउन ।

तिमीले मसँग
बिहेको माग राख
म असम्भवको
अडान राख्छु
कसैगरी सहमतिमा पुग्ने
प्रयास गरौँ
बरमालाको मिति तोकौँ
र हामीले पनि एकपटक
नयाँ नेपाल बनाइदिऊँ ।
को लम्फूले भनेको छ र
रुपसी बनाउनुपर्छ
त्यसैले आऊ
तिमी र म मिलौँ
र नयाँ नेपालको
अभियानमा लागौँ
झगडा गरौँ
तानातान गरौँ
दोषारोपण गरौँ
हानाहान गरौँ
र पुनः
आ–आफ्नै अडानमा
अडिग रहौँ
र फेरि कुरो मिलाएर
पुरानो मितिलाई
नयाँसँग साटिदिऊँ
र नेपाललाई
पुनः एकपटक
अझै नयाँ बनाइदिऊँ ।

झगडा गरेको ग¥यै गरौँ
नयाँ मिति तोकेको तोक्यै गरौँ
नेपाललाई झन् झन्
नयाँ बनाउँदै लैजाऊँ
र नेपाललाई नयाँ
बनाएको बनायै गरौँ ।

पोखराथोक १, पाल्पा