नेपाली हास्यव्यङ्ग्य अनलाइन पत्रिका

पशुपतिमा ढुकेर के माग्ने ?
घर घरमा पुगेर के माग्ने ?
माग्ने नै हो भने
अफिसमै बसेर
पलेटी कसेर माग्ने
टेबल मुनिबाट माग्ने
टेबल माथिबाट माग्ने ।

पशुपतिमा माग्ने को धनी भा’छ ?
देशले बिदेशै गई माग्दा पनि
खै के भा’छ ?
जति मागे पनि देश रोइरा’छ
तर अफिसमा माग्नेहरूको त
कतिको छ हारैहार
कतिका छन् कारैकार
कसैका छन् घरैघर ।

अब माग्ने नै हो भने पनि
हात मुख जोर्नलाई के माग्ने ?
मागे घरबारै जोर्ने गरी माग्ने
दाता ठहरै हुने गरी माग्ने
माग्ने साहु हुने
दिने कङ्गालै हुने गरी माग्ने ।

त्यसैले अब
माग्ने हो भने
धन्सारमा पसेर माग्ने
भन्सारमा बसेर माग्ने
बग्गीखानामा कसेर माग्ने
ठानामा घुँडा धसेर माग्ने
अड्डा अदालतको
मेचमा बसेर माग्ने
माग्दा माग्दा
उद्योगपति व्यवसायी
बरु देशै छोडेर भाग्ने ।

माग्ने नै हो भने
अरुलाई हरिकङ्गाल पार्ने गरी माग्ने
माग्ने चाहिँ करोडपति हुनेगरी माग्ने
माग्दा
कमजोर भए ठोकेरै माग्ने
बलियो भए ढोगेरै माग्ने
पत्रकारले लेखे पनि
अख्तियार देखे पनि
सरकारले छेके पनि
दिन दहाडै माग्ने
सुनको पहाडै माग्ने
माग्नलाई के लाज
आखिर परेँ म एउटा माग्ने ।

दाङ, हाल काठमाडौं