नेपाली हास्यव्यङ्ग्य अनलाइन पत्रिका

सिङ्गो देश लुट्दा मन दुखेन कि क्या हो ?
डन देख्दा पुलिस पनि लुकेन कि क्या हो ?

सुरक्षाका कर्मी पनि चोर सितै कुद्दा
चोर भेट्ने रहर नै पुगेन कि क्या हो ?

नीति नियम कानुन किताब लेख्नेहरू पनि
डनसित मन मोल्न मानेनन् कि क्या हो ?

सत्ता भत्ता प्रमाण पूर्जा हडप्नेले पनि
कानुन आफ्नो हातमा लिन जानेनन् कि क्या हो ?

प्रशासनको कुर्सी बिर्ता भन्नेहरू पनि
घुसलाई दुधभात ठानेनन् कि क्या हो ?

दिनमा सुती रातमा उठ्ने बानी परेकाले
रातारात धनी हुन जानेनन् कि क्या हो ?

न्याय जोख्ने तुलो भन्दा आफैं ठूलो भन्थे
नेता हेरी निसाप गर्न सकेनन् कि क्या हो ?

तर्साएरै जनमत सधैं लिन्छु भन्थे
परिवर्तित जनमन बुझेनन् कि क्या हो ?
ट्याङ्ला, काठमाडौं