नेपाली हास्यव्यङ्ग्य अनलाइन पत्रिका

(उल्का छन्द)

ए भान्जा भान्जी हो मेरा ए भाइ भतिजाहरू
ए जेठी सासूका नाति ए काकी माइजूहरू
सुनाउँदैछु कथा एउटा लौ न मामा र बाहरू
ए सोल्टि सोल्टिनी साढु दाजु र भाउजूहरू ।

एलडिओ सिडिओ जिएम काका मामा र मित छन्
सारा आफन्तका हितमा मेरा हित सिमित छन्
यो आफ्नै आफ्नाको घेरा म तोडी जान सक्तिन
मिठो बाहेक कुनै बस्तु म एक्लै खान सक्तिन ।

यस्तो भातृत्व होस् भेना अनि पो देश बन्दछ
यस्ता बिचारले साली विकासको पथ खुल्दछ
सुन्दैछु भाउजूका काका पर्ने मन्त्री भए अरे
सचिवमा बढुवा उनकै जेठो सालो भए अरे ।

प्रज्ञाका कुलपति साख्खै भान्जाका मित्र पर्दछन्
अदालतका ठूला सप्पै अफन्तै भित्र पर्दछन्
मालपोतका अधिकृतलाई म काका भन्ने गर्दछु
करका अधिकृत भन्छन् – म पुत्ने छोरो पर्दछु ।

एता खान्छु उता खान्छु आफन्तकैमा टार्दछु
यहाँ थाप्छु त्यहाँ थाप्छु म च्याँखे पनि पार्दछु
माडी माडी दुई हात म तेल झार्न सक्तछु
आफन्तहरूका गोडा चापुल्लै पार्न सक्दछु ।

कैले पहिरो पिडित हुन्छु काठमाण्डुमै रहे पनि
बगाउँछ बाढीले खेत एक बित्तै नभए पनि
न चाहियो नोकरी खेती न त वेपार उन्नति
आफन्तहरूका खल्ती छँदैछन् कति हो कति ।

नाता नयाँ नयाँ लाई म केही ऋण माग्दछु
कतै भेट भइहाले नडराइकन भाग्दछु ।
लौ ज्वाइं जेठा बा मामा अहिले छुट्टी पाउँछु
हजूरको घरमा भोलि म बस्ने गरी आउँछु ।
तिलगङ्गा, काठमाडौं