नेपाली हास्यव्यङ्ग्य अनलाइन पत्रिका

आजभोलि हाम्रो देशको पहिचान
विदेशमै सरेजस्तो छ,
अब त्यहीं गएर खोज्नुपर्छ हाम्रो देश !
हिंड, हामी त्यतै जाऔँ !
नेपाल खोज्न विदेश जाऔँ !

नेपालको सन्दर्भमा
सेमिनार, गोष्ठीहरू उतै,
हाम्रो विकासका लागि
योजना बन्ने पनि उतै,
मन्त्री–सांसद् गइरहेकै छन्
हिंड, हामी पनि जाऔँ
नेपाल बुझ्न विदेश जाऔँ !

नेपालका देवीहरू उतै
नपत्याए दिल्ली–बम्बैमा हेर
हाम्रा श्रम–देवताहरू पनि उतै
नमाने विदेशी कारखानामा हेर
प्राचीन मूर्ति र प्रतिमाहरू उतै
हाम्रा नयाँ प्रतिभाहरू पनि उतै
हिंड, हामी पनि उतै जाऔँ
नेपाल हेर्न विदेश जाऔँ !

फकलैंड, कारगिल र कोसोभोमा
गोरखाली चिहानहरू उतै
लाहुरे र दरबानका रूपमा
देशभक्त महानहरू उतै
हाम्रो सीप उतै, बुद्धि उतै
रगत उतै, पसिना उतै
पहिचान खोज्न उतै जाऔँ
नेपाल हेर्न विदेश जाऔँ !

नेताहरूको दौड र गुलामी उतै
कोर्निस, जदौ र सलामी उतै
स्वतन्त्रता र स्वाभिमानको
मोल, बिक्री र लिलामी पनि उतै
देश कुरेर बस्नेले के पायो ?
त्यही आटो(ढिंडो आधा पेट खायो !
“गडफादर“ र “माईबाप“ पनि उतै
चमकदमक र रवाफ पनि उतै
त्यसैले, आत्मा मारेर भाग्य जगाऔँ
सुनचाँदी र हिरा–मोती अब
जे खान मन छ उतै खाऔँ
मन–पेट भर्न विदेश जाऔँ !

‘तिमी नरहे देश डुब्न्या छ’ हास्यव्यङ्ग्य कवितासङ्ग्रह २०५६