नेपाली हास्यव्यङ्ग्य अनलाइन पत्रिका

कट्टु लगाई स्कुल जाँदा पाइन्ट लाउने मेरो धोको
जसोतसो स्कुल सक्दा कलेज धाउने मेरो धोको
पाइन्ट लाएँ कलेज धाएँ, धोको भने तन्की रह्यो
जति भर्यो रित्तिइने कस्तो हो यो मेरो धोको ?

शहरमा सयर गर्ने, गाडी चढ्ने मेरो धोको
शहर आएँ, जागिर पाएँ, बिदेश जाने मेरो धोको
अझै बढी कमाउने तृष्णा ज्वाला दन्की रह्यो
जति खान्छु भुँडी घट्ने म त रछु कति भोको ?

भिसा मिल्यो विदेश गएँ काम पाउने मेरो धोको
काम मिल्यो राम्रैसित, कामै थप्ने मेरो धोको
काम दाम दुबै हुँदा, ‘आफ्नो आँगन’ खड्की रह्यो
कस्तो रैछ मेरो धोको– माथि पुग्छ जति ठोको !

हाल  : काठमाडौं