नेपाली हास्यव्यङ्ग्य अनलाइन पत्रिका

खित्का- १ विमोचनको तरीका

२०७३ चैत्र १७ गते रूसी सांस्कृतिक केन्द्रको पे्रक्षालयमा सहभागी हुनुभएका सबै दर्शकहरूलाई सभापति घोषणा गरि कार्यक्रम शुरू गरिएको थियो ।

पे्रक्षालयमा रहेका सबै दर्शकहरूलाई साउती हास्यव्यङ्ग्य किताब बाँडिएको थियो । उद्धोषक सरोज घिमिरेले माइकबाट भन्दै थिए- क-कसका हातमा किताब आइपुग्यो, आइपुगेन भन्नाका लागि एकपटक उठेर किताब सहित हात उठाइदिनु होला । सबले उठेर किताब सहित हात उठाए । त्यहीबेला उद्धोषकले दर्शकहरूलाई धन्यबाद दिँदै भने- सबै दर्शकहरूले यो किताबको बिमोचन गर्नुभयो है ! विमोचनको नयाँ तरीका देखेर दर्शकहरू मुर्छा पर्ने गरि हाँसे ।

खित्का- २ यसरी भयो बिमोचन

हास्यकलाकार तथा लेखक गोपालराज मैनालीद्वारा लिखित, माणिकरत्न शाक्यद्वारा संकलित संपादित कृति हो- खुसुक्क भन्नुस् फच्या । कृषि बिकास बैकको सभा हल । आयोजक- भुँडीपुराण प्रकाशन । दिन- २०५३ भाद्र १९ गते ।

मञ्चमा आसिन प्रमुख अतिथि लगायत १५ जनाको कानमा बेहुला गोपालराज मैनालीले खुसखुस गर्नुभयो । सुन्ने चाहिँ मज्जाले हाँसिरहेका थिए । राजनीतिले नछोएको ठाउँ कहाँ छ र ! लोग्ने स्वास्नी बीच त राजनीति हुन्छ भनेर मलाई हँसाए । मैनालीको चर्तिकला दर्शक उत्सुकताका साथ हेरिरहेका थिए ।

सबैलाई त्यसो गरे लगत्तै प्रमुखख अतिथिले खुसुक्कसँग किताब निकालेर दर्शकतिर देखाउँछन् । कार्यकम संचालक केदार खड्का हाँसी हाँसी बोल्दै भन्छन्- खुसक्क भन्नुस् को बिमोचन खुसखुस गरेर फच्च्या भयो है ! त्यसपछि दर्शकहरूको एकमुष्ट हाँसो ।

०००
चाबहिल, सरस्वतीनगर