नेपाली हास्यव्यङ्ग्य अनलाइन पत्रिका

१)
गाई भैसीको दूध खाने छ कोही ?
ठेकीको मोही दिन्छु लाने छ कोही ?
सेवा गर्नाले मिल्छ मेवा भनिन्छ
भैंसी भोकैछन् घाँस जाने छ कोही ?

२)
भोको खानाको आस गर्दोरहेछ
भान्सेले आफ्नै पेट भर्दोरहेछ
बाङ्गाटिङ्गाकै मात्र आयो जमाना
निर्धा नाथेले मर्नुपर्दोरहेछ ।

३)
गरें भन्छ सेवा खटाएर दिन्छ
म भोकैछु भन्दा घटाएर दिन्छ
नबाँच्ने बँचाएँ भनी स्वाङ पार्छ
अरौटेभरौटे चटाएर दिन्छ ।

४)
कोही बेलामा ढोग्न खोज्दोरहेछ
कोही बेलामा बोक्न खोज्दोरहेछ
तिम्रै सेवाका निम्ति लाग्दैछु भन्थ्यो
केको लाग्थ्यो त्यो जोख्न खोज्दोरहेछ ।

५)
त्यो गाउँ पुर्ने पहिरो रहेछ
पीडा असाध्यै गहिरो रहेछ
आवाज आयो मरियो बँचाऊ
उद्दार गर्ने बहिरो रहेछ ।

ओखलढुंगा