नेपाली हास्यव्यङ्ग्य अनलाइन पत्रिका

उपेन्द्र पौडेल :

१.
बाटोमा पनि आजकल त हिँड्नै नहुने भो
यस्तै हो भने गणतन्त्र फर्सीझैँ कुहुने भो
खै त बोल्ने लेख्ने र स्वतन्त्र हिँडने अधिकार ?
तिमीप्रतिको सबै भरोसाहरू अब चुहुने भो ॥

२.
सामन्तवादको बिरोध गर्नेनै आज सामन्ती भए
हेर्दा हेर्दै विभिन्न काण्ड मच्चाउनेमा गन्ती भए
मिठा भाषण त यिनका शब्दजाल मात्र रहेछन्
जनताको हैन अब यिनीहरू स्यालका जन्ती भए ॥

३.
मै जान्ने मै बुझ्ने, आफूले आफैँलाई, ठूलो नठान
वर्षाको पानी भल मात्र हो, स्थायी कुलो नठान ।
अरुलाई तौलने तराज़ुमा,आफूलाई पनि जोखी हेर
घुँयत्रो एउटा फिता भए पनि त्यसलाई लुलो नठान॥

०००
पोखरा- ११, कास्की