नेपाली हास्यव्यङ्ग्य अनलाइन पत्रिका

अमर सन्तति :

१.
हावामा पिलपिल दीप नजलाएकै राम्रो
दिगो हुन्न, टुप्पाबाट नपलाएकै राम्रो
पढ्नू हजुर इतिहास ज्ञान लिनू समयमै,
दुई दिने हुकुमी शासन नचलाएकै राम्रो ।

२.
ठूलो भाग्यद्रष्टा अगुवा ठान्ने म आफैँ बुद्धू हुँ
गोप्य कोठामा स्वस्तिक हान्ने म आफैँ बुद्धू हुँ
बुद्धि -विवेक गुमाएर सबैभन्दा महान् देखी
सधैँ उहाँ जस्तालाई नै छान्ने म आफैँ बुद्धू हुँ ।

३.
पोहोर पाल बोकेर भूकम्प पीडितको गाउँघरमा पाल्नु भो
अस्ति चामल बोकेर बाढीपीडितको घरघरमा पाल्नु भो
घर खरानी भएपछि पीडाको आगो निभाउन राहतमा उहाँ,
आज मिनरल बोतल बोकेर अग्निपीडितको घरमा पाल्नु भो ।

०००
भक्तपुर