नेपाली हास्यव्यङ्ग्य अनलाइन पत्रिका

अमर सन्तति

१.
मान्छेले मान्छेलाई क्रुद्ध भै कराउँदैछन्
शक्तिको मातले युद्ध अझै गराउँदैछन्
परेर अल्पमतमा अस्तित्व जोगाउन आफ्नै,
बस्ती बस्तीबाट अचेल बुद्ध नै हराउँदैछन् ।

२.
जून छोपी आकाशको तारा देखाउँदैछन्
दिनदहाडै पो रात पार्ने पारा देखाउँदैछन्
आफूभने पाइलापाइला नियम कानुन मिच्ने !
अरुलाईचाहिँ संविधानको धारा देखाउँदैछन् ।

३.
भेडा र बाख्रा पालिन्छ यहाँ, गोठाला धेरै छन्
देउताको पूजा गरिन्छ यहाँ, बधशाला धेरै छन्
सदैव उल्टो हिँड्दछ सत्ता, सुशासन फलाक्दै,
कामकाज राम्रो टारिन्छ यहाँ, खेताला धेरै छन् ।

०००
भक्तपुर