नेपाली हास्यव्यङ्ग्य अनलाइन पत्रिका

रूद्र ज्ञवाली :

१.
बाहिर त सारसौंदो देखिन्छौँ भित्र पाकिरहेका हुन्छौं
मनमा आगो तर ओंठमा मुस्कान हाँसिरहेका हुन्छौं
सम्भ्रान्तहरूकै कुरा हुन् यी महोदय मान्नुस् नमान्नुस्
पर्दामा एक नेपथ्यमा अर्कै जीवन बाँचिरहेका हुन्छौं ।

२.
भोका कुनै जीव छैनन् केही न केही खाएका छन्
चराहरूको जिन्दगी हेर घर छैन तर रमाएका छन्
आफ्ना निमित्त महल ठ्ड्यायौ त के कमाल गर्‍यौ
तिम्रा घर जत्रै देवल त धमिराले पनि उठाएका छन् ।

३.
कसैलाई मदिराले कसैलाई चियाले सिद्ध्याउँछ
प्रत्येक जीवन कुनै न कुनै जरियाले सिद्ध्याउँछ
आफूलाई अविनाशी ठान्ने ए ! अहङ्कारी मान्छे
याद राख्नु फलामलाई उसकै खियाले सिध्याउँछ ।

४.
अति नगर्नुस् विश्वासको त्यान्द्रो पनि टुट्न सक्छ
अरु कुट्ने मुसलले आफ्नै हात पनि कुट्न सक्छ
चाकरी र चाप्लुसीको भरोमा गर्दै नगर्नुस् महोदय
फापर चुट्ने लौरोले मसुरो मास पनि चुट्न सक्छ ।

०००
भैरहवा