नेपाली हास्यव्यङ्ग्य अनलाइन पत्रिका

दायित्व वाङ्मय प्रतिष्ठान, नेपालले यो हफ्ता लगातारै कार्यक्रम गरेको छ। अस्ति पुरस्कार वितरण गरेको थियो भने हिजो २०७९ असार ५ गते प्रतिष्ठानको आयोजनामा पाँच जना कविहरूको संयुक्त कवितासङ्ग्रह ‘आजको आकाश’ एक भव्य समारोह बीच प्रा. डा. माधवप्रसाद पोखरेलले कमलादीस्थित नेपाल प्रज्ञाप्रतिष्ठानको सभाकक्षमा लोकार्पण गर्नुभएको खबर छ ।

कविहरू प्रह्लाद पोखरेल, जीवराज घिमिरे, डा. राजेन्द्रप्रसाद अधिकारी, रवीन्द्र आशिष शैली र आर. के. धर्मस्थलीका कविताहरू समाविष्ट सो कृति यस अघि पनि यही शीर्षकमा यिनै कविहरूद्वारा प्रकाशित कृतिको निरन्तरता हो । यस अघि यी कविहरूद्वारा २०४२ सालमा पहिलो पटक र २०६३ सालमा दोस्रो पटक प्रकाशन गरिएको थियो ।

दायित्व वाङ्मय प्रतिष्ठानका अध्यक्ष रामप्रसाद पन्तको सभापतित्वमा सम्पन्न सो कार्यक्रममा प्रा. डा. खगेन्द्रप्रसाद लुइँटेल र साहित्यकार तथा गोरखापत्र दैनिकका पूर्व प्रधानसम्पादक श्रीओम श्रेष्ठ रोदनले लोकार्पित कृतिका बारेमा बोल्नुभएको थियो भने पाँचै जना कविहरूले सङ्ग्रहबाट कविता वाचन गर्नुभयो । प्रमुख अतिथि प्रा. डा. पोखरेलले नेपाली कविताको परम्परा र पाँच कविहरूको नेपाली कविताको संवद्र्धनमा योगदानबारे चर्चा गर्दै आयोजक संस्था दायित्व वाङ्मय प्रतिष्ठानको योगदानको प्रशंसा गर्नुभयो ।

कार्यक्रमका सभापति रामप्रसाद पन्तले कृति प्रकाशन गर्न पाएकामा दायित्व वाङ्मय प्रतिष्ठानका तर्फबाट खुसी र आभार व्यक्त गर्नुभयो । प्रतिष्ठानका सदस्य यादव भट्टराईद्वारा सञ्चालित कार्यक्रममा महासचिव डा. लेखप्रसाद निरौलाले स्वागत मन्तव्य र सदस्य डा. नम्रता पाण्डेले धन्यवाद ज्ञापन गर्नुभएको थियो ।