नेपाली हास्यव्यङ्ग्य अनलाइन पत्रिका

१.
कर र महङ्गी बढाउने बेलामा सरकार छेउमा देखिन्छ
भोकानाङ्गा जनताको आँसु पुछ्ने बेलामा कहाँ छेकिन्छ
कस्तो विचित्रको शासनशेैली चलिरहेको छ देशमा, अहो !
सुशासनको कथा कमिसन भ्रष्टाचारको मसीले लेखिन्छ ।
२.
कांगडा टीस्टा खुम्चिएर मेची काली बनेपनि
दसगजा र लिम्पियाधुरा करेसामा ढलेपनि
सत्तारूढ शासकवर्ग होशियार किन हुन्नन्
देशको अस्मिता जलाउने तातोहावा चलेपनि ।
३.
लोकतन्त्रको उज्यालो आफ्नै छायाले छेकेपछि
भोकापेटको कहानी सुनको कलमले लेखेपछि
चरीत्रहीन अधम संतान भन्न के को गाह्रो मान्नु
जानीजानी दुष्टखुट्टा आमाकै छातीमा टेकेपछि ।
४.
प्रेम थियो या बासना उनले निम्तो गरिन्
गोधूलिमा ढोकैदेखि पुष्पपत्र छरिन्
रातरानीले महकिंदै जब सुवास छर्यो
जुनेलीको उज्यालोमा अझै छेउमा सरिन् ।

दमक, झापा