नेपाली हास्यव्यङ्ग्य अनलाइन पत्रिका

हिन्दी साहित्यका शीर्ष हास्यव्यङ्ग्यकार हरिशंकर परसाईंको जन्म २२ अगस्त सन् १९२४ मा होशंगावाद, मध्येप्रदेशमा भएको थियो । नागपुर विश्वविद्यालयबाट एम्.ए. गरेपछि केही समय विद्यालयमा शिक्षक रहेका परसाईंको पूरै जीवन साहित्य सिर्जनामै व्यतित भएको थियो । भारतको सर्वोच्च ‘साहित्य अकादमी पुरस्कार’ (१९८२), शिक्षा सम्मान र शरद जोशी सम्मान (१९९२) बाट सम्मानित परसाईंका प्रमुख र लोकप्रिय हास्यव्यङ्ग्य कृतिहरूमा ‘प्रेमचन्द के फटे जुते’, ‘विकलाङ्ग श्रद्धा का दौर’, ‘सदाचरका तजवीज’, ‘शिकायत मुझे भी है’, ‘ठिठुरता हुआ गणतन्त्र’, ‘भूतके पांव पीछे’, ‘पगडण्डियोंका जमाना’आदि रहेका छन् । पछिल्लो समयमा परसाईंका हास्यव्यङ्ग्य कृतिहरूको सङ्कलन ६ भागमा ‘हरिशंकर परसाईं ग्रन्थावली’ प्रकाशित गरिएको छ । उनका रचनामा भारतीय समाजमा व्याप्त दलीय राजनीति, प्रशासन, समाज र रीतिरिवाजमा देखिने पाखण्डमाथि बेधक प्रहार गरिएको पाइन्छ । निबन्ध, उपन्यास र कथा उनका प्रमुख विधा हुन् तापनि सर्वाधिक प्रशिद्धि चाहिँ हास्यव्यङ्ग्यमा प्राप्त गरेका छन् । उनको देहान्त ७२ वर्षको उमेरमा १० अगस्त १९९५ मा भएको हो ।