नेपाली हास्यव्यङ्ग्य अनलाइन पत्रिका

दशैँमा टीका थाप्न
छोरा छोरीका
परिवारहरू आए
नातिनीको
बाङ्गो टीका
र
घरै उचाल्ने चित्कार
सम्झाएँ,
’बाङ्गो टीका देखेर
भगवान पनि खुशी हुन्छन् ।’
नातिनी खुशी भई
अनि,
घोषणा गरी
चस्मा नलगाएर
बाबाले
बाङ्गो टीका लगाइदिस्यो
बाबा त
बुढो भइसेछ ।

देब्रे हातमा डस्टर
दाहिने हातमा चक
कक्षा कोठा पस्नै लाग्दा
हेड सरको कर्कश आवाज आयो
आज शिक्षक बैठक छ
चाँडै कक्षा सक्नु होला
कक्षामा,
मन पर्ने परिच्छेद पढाएँ
विद्यार्थीले पुरै बुझे
जाँच्न कक्षामै गृहकार्य दिएँ
उता विद्यार्थी व्यस्त,
यता म सुस्ताउन थालेँ
झप्किए छु,
विद्यार्थी त गायब
मन आत्मग्लानीले
भरिएर उठेँ
बैठक समेट्न
कार्यालय छिरी नसक्दै
हेडसर बोल्नु भो
बैठक त सकियो
भुलक्कड हुनु भएछ !
बुढो हुनुभो ।

दुवै हातमा झोला
घरको मुख्यद्वार छिर्नैलाग्दा
अर्धाङ्गिनीको मधुर स्वर कानमा बज्रियो
ढोका लगाउन नभुल्नू
आवाज कानमा ठोक्कियो
दिमाग पसलेले समातेको थियो
रुपियाँ लियो पसलले
बाँकी त फिर्ता गरेन
कोठामा पुगेँ
र,
झल्याँस्स सम्झेँ
जा !
ढोका बन्द गर्न भुलेछु
श्रीमती गुर्राइन्
ढोका खुल्लै ?
ए बुढा !
बुढो भएछौ ।