नेपाली हास्यव्यङ्ग्य अनलाइन पत्रिका

मेघराज पौड्याल :

बुढाबुढी समाजमा सुरम्य दीप बाल्दछन्
नियाँ निसापमा कडा फलाम त्यो पगाल्दछन्
समाज भित्र जोसिलो सुगन्ध नित्य छर्दछन्
हिमालमा पहाडमा तरी र फाँट भर्दछन्।।१।।

गरेर नित्य साधना चुलिन्छ राष्ट्र भावना
सुधी विचार वृद्धको कठोर गर्छ सामना
पढेर मात्र हुन्छ के? स्वयं रहन्न देशमा
बुढाबुढी छ घस्रदै समस्त ती प्रदेशमा।।२।।

शरीर जीर्णको बुढो विचारको मनोहर
पखाल्दछन् प्रभातमा छरेर नित्य निर्मल
पवित्र हुन्छ भावना रहन्छ शुभ्र चिन्तन
अनन्त भक्त देशको विकास गर्छ कन्चन।।३।।

न लोभ गर्छ वृद्धले न पाप बढ्छ वृद्धमा
समाज भित्र निक्खरा विवेक हुन्छ चित्तमा
दया रहन्छ आँतमा विभेद हुन्न जातमा
सुधार गर्छ वृद्धले मिठास हुन्छ बातमा।।४।।

न बढ्छ जोस वृद्धमा न गुम्छ होस वृद्धमा
निसापमा नवीनता सचेत बन्छ छिद्रमा
न आस गर्छ वृद्धले न त्रासमा डराउँछन्
प्रभात धर्म कर्ममै बुढाबुढी रमाउछन्।।५।।

०००
कञ्चनरूप- ७, सप्तरी