नेपाली हास्यव्यङ्ग्य अनलाइन पत्रिका

हेम अधिकारी :

चाँडै फर्क सँगै लिएर दुलही धन्दा बिहेको गरौँ
भित्र्याई दुलही नयाँ, सुमनझैँ शोभा र आशा छरौँ
खर्चै छैन फिरेस् लिएर सँगमा कर्तब्य आफ्नो भनी
भित्र्याई दुलही र भाइ घरमा फर्केर जानू अनि ॥

कस्ले सुन्छ, ठुले छ कुन् सहरमा, कस्ले लगी भन्दिने
जेठो बाहिरियो छ आस घरमा कान्छो भने के हुने
जम्मै छन् तर साथ छैन बुढियौँ मान्दैन कोही भनी
छोरा छन् ,दुलही छ तैपनि यहाँ छैनन्, सहारा पनि ॥

आशा लाग्छ सधै बधूसुत मिली जिम्मा लिऊन् यो अनि
तातो भात सधैँ मिठा वचनले पस्केर दिन्छन् भनी
हाम्रो हालत बिग्रँदैछ दिनहूँ, थामी घरैमा बसून्
कान्छी मात्र छ आस दीप घरमा छोरी-बुहारी बनून् !

छोरा जोर हुँदा शशी-रवि दुवै साँच्चै उदाएसरि
कत्रो हर्ष थियो,खुसी कति थियो आनन्दको बल्लरी !
पुग्दैनन् अब शब्द भन्न अगिका आनन्दका हर्षका
पुग्दैनन् सब भन्न शब्द अहिले पीडा व्यथा कर्षका ॥

०००
दमक, झापा