कल्पना अधिकारीभए पुग्छ साथ
छ अर्को ठुलो मित्र यो रक्तचाप बनेको छ आत्मीय सम्बन्ध खास घरी बढ्छ ह्वात्तै झिकी उग्रपारा यिनै लाग्छ ज्यादै हितैषी पियारा ।
कल्पना अधिकारी :
बुढ्यौली अवस्था छ साह्रै मजाको
न चिन्ता यताको न चिन्ता उताको
सबैकाम हल्का भएको छ आज
छ आराम आराममा यो दिमाग ।१।
बसेको छ छोरो विदेशी धरामा
कमाई छ राम्रो निजी पाखुरामा
छ जापान छोरी गरेकी छ काम
उतै दुःख गर्छे मिलेकै छ दाम ।२।
छ नेपालमा एक बस्ने व्यवस्था
छ मानौँ असाध्यै मिलेको अवस्था
चिनी रोगले साथ छोड्दैन मेरो
उही रात कालो, बिहानी उज्यालो ।३।
छ अर्को ठुलो मित्र यो रक्तचाप
बनेको छ आत्मीय सम्बन्ध खास
घरी बढ्छ ह्वात्तै झिकी उग्रपारा
यिनै लाग्छ ज्यादै हितैषी पियारा ।४।
थिइन् सङ्गिनी चट्ट छोडिन् मलाई
परम् धामको गर्न लागिन् भलाइ
खुशी नै छु जे जे मिलेको छ हात
उनै कृष्णराधा भए पुग्छ साथ ।५।
०००
काठमाडौं
बुढ्यौली अवस्था कति बेमजाको !
अनेकौं व्यथाले मचाए रडाको
न सपना देखिन्छन् भोलिका उज्याला
जीवन हो यो कस्तो अनौठो तमासा ।।
निराशा यता छन् उता छन् निराशा
न सन्तान दिन्छन् बलियो भरोसा
न छन् इष्टमित्र अत्यन्तै घनिष्ठ
नजिकै छ मृत्यु। कहालिन्छ चित्त ।।