नेपाली हास्यव्यङ्ग्य अनलाइन पत्रिका

कविराज घिमिरे :

माटो छ उर्वर यहाँ जब बीज रोप्ता
उम्रिन्छ खास दिनमा श्रम नित्य चोप्दा
थारै रहन्न बिरुवा जल खाद पाए
के हुन्न यो मुलुकमा पसिना बगाए ? १

बारी छ खेत गहिरी लटरम्म फल्ने
कोदो र धान गहुँको छ मकै सुसेल्ने
छन् कर्मशील वय जो अगुवा उदाए
के हुन्न यो मुलुकमा पसिना बगाए ? २

लत्रक्क झुल्दछ यहाँ रमणीय बाला
फल्छन् अनेक फल ती रसनीय खाँदा
छन् वृद्ध तेज असली फल जो छ खाए
के हुन्न यो मुलुकमा पसिना बगाए ? ३

छिन् पूर्ण जूनसरिकी जननी खुसीमा
त्यस्तै पिता पनि रहे अति स्वस्थतामा
आनन्द मान्दछु म ता मन यो हँसाए
के हुन्न यो मुलुकमा पसिना बगाए ? ४

बाख्रा खसी र कुखुरा अनि फेरि गाई
भैँसी समेत रहँदा अनि गोठ धायी
ढ्रुङ्ग्रो भरिन्छ दुधले जब खान पाए
के हुन्न यो मुलुकमा पसिना बगाए ।।५

०००
भक्तपुर