नेपाली हास्यव्यङ्ग्य अनलाइन पत्रिका

रामशरण न्यौपाने :

होस् धामझैँ घर सधैँ तमले नछाउन्
सन्तानबाट अवमूल्यन झन् नआउन्
कैलासका शिव उमासरि नै घमाउन्
माता पिता निधि दुई घरमै रमाउन्॥१

पीडा प्रकोप र घृणा कहिल्यै नपाउन्
सेवा सुसारतिर सन्तति नित्य धाउन्
सर्वोच्च स्थानबिच आसन ती जमाउन्
माता पिता निधि दुई घरमै रमाउन्॥२

सीता र बुद्धसरि हुन् तनया र छोरा
कोही नहुन् बल र बुद्धि गिरेर कोरा
हालेर प्वाँख परदेश कुनै नजाउन्
माता पिता निधि दुई घरमै रमाउन्॥३

यो देशमा श्रम गरी पसिना बगाउन्
नेपालको विजय गौरव गीत गाउन्
सन्तानले घर र देश दुवै सजाउन्
माता पिता निधि दुई घरमै रमाउन्॥४

देखे सहस्र जसले शशि पूर्णिमाको
धेरै भए अनुक्रिया र शरीर पाको
सन्तानले विजयको यश कीर्ति गाउन्
माता पिता निधि दुई घरमै रमाउन्॥५

०००
भक्तपुर