बिन्दु दहाल ‘मूकदर्शक’वृद्ध घरमा
कतै जाँदा फर्कौँ गृहतिर छिटै सेवक हुन गरौँ सेवा स्वार्थी तिमिर मनको घैमल धुन बनौँ हामी सच्चा सुजन मनका वृद्ध नरमा खुसी मान्दै हाँस्छन् हरबखत यी वृद्ध घरमा ।
बिन्दु दहाल मूकदर्शक :
रुगामर्की खोकी कसर तनको बुझ्न सकिए
बुबाआमालाई हरपल झुकी पुज्न सकिए
हुने भोकैतिर्खै भय पर गरे ज्येष्ठ नरमा
खुसी मान्दै हाँस्छन् हरबखत यी वृद्ध घरमा ।
बुझे भित्री पीडा पलपल पुगी छेउ तिनको
छ के आमा बाबा जहर मनमा घाउ ननिको
भनी बुझ्दै राखे सुखसयलको उच्च भरमा
खुसी मान्दै हाँस्छन् हरबखत यी वृद्ध घरमा ।
बुबा आमा हामी परिजन बुझी हार्दिक बने
सँगै खाऔँ खाना वरिपरि बसी लौ सब भने
सधैँ राम्रो हुन्थ्यो जनक जननी वृद्ध नरमा
खुसी मान्दै हाँस्छन् हरबखत यी वृद्ध घरमा ।
पितामाता रोगी यदि हुन गए औषधि गरौँ
सधैँ राम्रा बुट्टा मृदुल मनका सुन्दर भरौँ
रमाऔँ साथैमा सब सुतसुता ज्येष्ठ नरमा
खुसी मान्दै हाँस्छन् हरबखत यी वृद्ध घरमा ।
कतै जाँदा फर्कौँ गृहतिर छिटै सेवक हुन
गरौँ सेवा स्वार्थी तिमिर मनको घैमल धुन
बनौँ हामी सच्चा सुजन मनका वृद्ध नरमा
खुसी मान्दै हाँस्छन् हरबखत यी वृद्ध घरमा ।
०००
दमक- ८, झापा
Subscribe
Login
0 Comments
Oldest
