बिन्दु दहाल ‘मूकदर्शक’देखिन्छ चाल ढर्रा
हाम्री वसुन्धराको सौभाग्य हेर्नु पर्छ नेता उदेक लाग्ने सम्पूर्ण फेर्नुपर्छ छानो चुहिन्छ हाम्रो सारा मिलेर टालौँ वृद्धा र वृद्ध भन्छन् सोचेर भोट हालौँ ।
बिन्दु दहाल मूकदर्शक :
पार्टीहरू असाध्यै चर्का बनेर आए
विश्वास क्षीण पार्ने नारा उराल्न लाए
आधार छैन केही आशा खुसी नपालौँ
वृद्धा र वृद्ध भन्छन् सोचेर भोट हालौँ ।
नेपाल ध्वस्त पार्ने देखिन्छ चाल ढर्रा
गालीगलौच गर्छन् बोल्छन् असभ्य टर्रा
संस्कार भेषभूषा त्याग्नेहरू नियालौँ
वृद्धा र वृद्ध भन्छन् सोचेर भोट हालौँ ।
कोही अमेरिकाको ती नाइके गनिन्छन्
हुन् भारतीयपन्थी कोही यसै चिनिन्छन्
के हो रहस्य आफैँ सम्झेर पाउ चालौँ
वृद्धा र वृद्ध भन्छन् सोचेर भोट हालौं ।
यो देश स्वर्गजस्तै पार्छौँ भनेर ढाँट्छन्
पैसा र मासु रक्सी खाऊ भनेर बाँड्छ्न्
आऊ मिलेर त्यस्ता पाजी चिनेर ढालौँ
वृद्धा र वृद्ध भन्छन् सोचेर भोट हालौँ ।
हाम्री वसुन्धराको सौभाग्य हेर्नु पर्छ
नेता उदेक लाग्ने सम्पूर्ण फेर्नुपर्छ
छानो चुहिन्छ हाम्रो सारा मिलेर टालौँ
वृद्धा र वृद्ध भन्छन् सोचेर भोट हालौँ ।
०००
दमक ८, झापा
Subscribe
Login
0 Comments
Oldest
