नेपाली हास्यव्यङ्ग्य अनलाइन पत्रिका

अशोककुमार शिवा :

जिन्दगी पनि अचम्म कै भेटिएछ गाँठे, के खोज्छ के । जतिखेर पनि खोजेको खोज्यै गर्छ । हुन त जिन्दगी भनेकै खोज नै रहेछ, जन्मिन तरखर हुँदाबाट नै खोजी सुरु हुने बाटो कता हो भनेर ? जन्मियो खानेकुरा कता हो ? खायो तातो कता हो ? तातो पायो निद्रा कता हो ? निन्द्रामा नै हाँस्यो, हातखुट्टा चलायो थाङ्ग्नामा सुसु तातो हुञ्जेल मुसुमुसु चिसिए च्याँ च्याँ । रुनु किन रे भन्दा थाङ्ग्ना फेरिदिने मान्छेको खोजी ।

अलिक पछि बोल्ने कसरी भन्ने खोजी । पढ्ने लेख्ने खोजी । खेल्ने साथीको खोजी । मिल्ने साथीको खोजी । दया गर्नेको खोजी । माया गर्नेको खोजी । स्कूल अनि कलेजको खोजी । प्रेमको खोजी । प्रेमिकाको खोजी । जीवन साथीको खोजी । बालबच्चाको खोजी । सरल जीवन यापन खातिर जागिरको खोजी । जागिर पाए प्रोमोसनको खोजी । प्रोमोसन पाए राम्रो ठाउँ पोष्टिङको खोजी । राम्रो ठाउँ पोष्टिङ पाए खल्ती भर्ने बाटोको खोजी । खल्ती भरिए खर्च गर्ने ठाउँको खोजी । छोरी बडे ज्वाईं र छोरा बडे बुहारीको खोजी । नातीनतिनाको खोजी । कति खोजी कति ।

फेरी आधुनिकताको खोजी । टेलिफोन आयो डायल गर्ने नम्बरको खोजी । टिभी आयो च्यानलको खोजी च्यानल आयो । राम्रो प्रोग्रामको खोजी । रिमोटको खोजी झनै रमाईलो, घर भरीका सदस्यको खोसाखोस । रिमोट पायो बटन कुन दबाउने खोजी बटन दबायो भोलमको खोजी । मोबाईल आयो कुन ब्राण्डको किन्ने भन्ने खोजी । किन्यो कस्लाई कल गर्ने भन्ने खोजी । अनेकन एप्सहरू आए सबैको परीक्षण खोजी । टिकटक आयो भिडियोको खोजी । भिडियो पायो राम्रो र मीठो खालको भिडियोको खोजी । यता खोजी उता खोजी । खोजी गर्दा गर्दा नथाकिने । न दिनमा थकाई छ न रातमा निन्द्रा । १२ बजे सुत्यो ३ बजे उठ्यो निन्द्रा हराएर अरुथोक कै खोजी । जोडी हककुदा त रातमा एकपल्ट ब्युझिनु नित्यकर्म जस्तै होला र हुनु पनि पर्दो हो ।

अरु चिजको खोजी त थियो थियो कल्पना पनि नसुत्ने हैट, जिन्दगी । दिनमा दिनकै खोजी रातमा सपनाको खोजी । कहिले बिपनाको खोजी, कहिले सपनाको खोजी । सम्झनालाई तिलान्जली दिँदै नयाँ नयाँ सृजनाहरू लाईन लगायो अनि परेड खेलायो । आफूलाई हात लाग्यो शून्य । शून्य पनि सानो भएपो चित्त बुझाउनु अष्ट्रिचको अण्डा जत्रो शून्य । प्रश्न गर्‍यो जवाफको खोजी । जवाफ दियो प्रतिक्रियाको खोजी । जीवन त गोताखोर नै रहेछ नि । यो जिन्दगीको समापन पछि के को खोजी हुने होला ? वास्तवमा यो जीवित जिन्दगी त खोजीमा नै बित्ने रहेछ ।

०००
गल्कोपाखा, काठमाडौं ।