नेपाली हास्यव्यङ्ग्य अनलाइन पत्रिका

मनीषकुमार शर्मा ‘समित’ :

असिनापसिना भएर चित्रगुप्त यमराजको अघि देखा परे ।

निचोरिएको अनुहार देखेर यमराजले सोधे – “के भयो चित्रगुप्त किन हडबडाएको ?”

“के हुनु नि महाराज, बरबादै भयो नि !” चित्रगुप्तले ओठ कमाउँदै भने ।

“हैन के भयो खुलस्त भन ?” यमराजको मनमा पनि चिसो पस्यो ।

“महाराज जसको मिति पुगेको थियो त्यसलाई नउठाएर अर्कैलाई उठाएछन् ।” चित्रगुप्तले निवेदन गरे ।

“ल यो त बित्यासै भयो ! कसरी यत्रो ठुलो दुर्घटना हुन गयो चित्रगुप्त ?”

“मेरो हिसाबकिताबमा काल समय सबै ठिक थियो । यमदूतहरूलाई त्यही अनुसार आदेश दिएको थिएँ । तर उनीहरू झुक्किएछन् ।“

“असम्भव यो हुन सक्दैन ! आजसम्म नझुक्किएका दूत कसरी झुक्किन्छन् ?” यमराजको आवाजमा आवेश झल्कन थाल्यो ।

“हो प्रभु ! त्यो असम्भवलाई मानव जातिले सम्भव गरिदिए ।”

“हैन के भनेको ? मानव जातिले के त्यस्तो चमत्कार गरे हँ ?”

“मानव निर्मित प्रत्येक प्रविधिहरू हाम्रा लागि चुनौति हुँदैछन् । एकै स्वभाव र रूपका धेरै जना भएकाले दूतहरू यो पटक मानवजातिले बनाएको प्रतिरूपण (क्लोनिङ) प्रविधिमा नराम्ररी फसेछन् प्रभु !”

०००
मध्यपुर ठिमी, भक्तपुर ।