नेपाली हास्यव्यङ्ग्य अनलाइन पत्रिका

हरिप्रसाद पौड्याल :

प्राणभन्दा ठुलो ठाने प्रजातान्त्रिक शासन
थापेर वक्षमा गोली हल्लाए उच्च आसन ॥१

झुकेन वीरको माथ अन्तत : शासकै गले
योद्धा ती मुक्तिका निम्ति लड्दा शहीद भै ढले ॥२

गरेर सम्झना आज भुल्नुहुन्न अरु दिन
प्यारा शहीद ती हाम्रा बुझ्नैपर्छ लडे किन ?॥३

प्रजातन्त्र हुँदै आज गणतन्त्र मनाउँदा
भयो प्रगति के हेरौँ आफैँ सत्ता समाउँदा ॥४

पदलिप्सा बढेको छ स्वार्थ झन् चुलिँदै गयो
नेतृत्व किन हो आज पैसामा भुलिँदै छ यो ॥५

साझा उद्देश्यका लागि आन्दोलन भए कति
त्याग शहीदको बिर्सी खुट्टा तान्ने भयो मति ॥६

म यो पार्टी तँ त्यो पार्टी अहङ्कार बढी गर्‍यौ
अनेकौँ वादमा लाग्यौ जनता देश बिर्सियौ ।७

उत्सर्ग ज्यानको गर्ने शहीद वीर हुन् चिनौँ
निजी स्वार्थ सबै छोडी उनैको मार्गमा हिँडौँ ॥८

०००
धुलाबारी, झापा