नेपाली हास्यव्यङ्ग्य अनलाइन पत्रिका

योगीश कृष्ण :

हिजो मात्र एकजना मन्त्रीले वक्तव्य प्रकाशन गरेर उनको चरित्र हत्या भएको खुलासा गरे । षडयन्त्रतापूर्वक योजनाबद्ध तवरले उनको चरित्र हत्या भएको रहेछ । चरित्रको हत्या पनि गजबको हुन्छ । जसको चरित्रको हत्या हुन्छ, उसलाई थाहा हुन्छ -उसको चरित्रको हत्यारा को हो । क-कसले उसको चरित्रको हत्या गर्ने षडयन्त्र गरे । तैपनि ऊ आफ्नो चरित्रको रक्षा गर्न सक्दैन ।लाचार छ । चुपचाप हेरिरहन्छ । कोही आउँछन् । हतियारसहित । उसको चरित्रको हत्या गर्छन् । हिँड्छन् । हत्या गरेपछि ऊ रोइकराइ गर्छ- लौ न नि । मेरो चरित्रको हत्या भयो ।

उनी बहालवाला मन्त्री । उनको चरिुत्रमाथि धेरैको आँखा लागेको हुन सक्छ । दलाल, दूतावास, आफ्नै पार्टीका अर्को गुटका साथीहरू, पत्रकार, विपक्षी दलका नेता, धेरै घुस माग्यो भनेर रिसाउने सेवाग्राही आदि । सब अहोरात्र खटिरहेका हुन्छन् । कतिखेर मौका मिल्ला र त्यसको चरित्रको निर्ममतापूर्वक हत्या गरिदिऊँ । जबसम्म उनी पदमा रहिरहन्छन्, उनको चरित्र सङ्कटमा हुन्छ । पदबिनाको चरित्र के चरित्र ?

चरित्र थरिथरिका हुन्छन् । एउटा विशिष्ट खालको पदसँग जोडिएको हुन्छ । उसको चरित्रको हत्या सामान्य ढङ्ले हुँदैन । ठूला ठूला आर्थिक घोटाला । विशेष प्रेम सम्बन्धका कारण तिनको चरित्र हत्या हुन्छ । यस्तो चरित्रको महत्व नै बेग्लै । यस्ताको चरित्र अरु धेरैको चरित्रसँग गाँसिएको हुन्छ । उसको चरित्र सँगसँगै अन्य कतिजनाको चरित्र स्वाहा हुन्छ । चरित्रको सामूहिक हत्या ।

सामान्य चरित्र लाबारिस कुकुर झैँ मारिन्छन् । बिना कुनै तामझाम । कहिले लोकल रक्शीको पसलमा । कहिले सय पचास सापटीको झन्झटमा । कथंकदाचित कसैलाई जिस्काएको कारणले । यस्तो चरित्रको हत्याको कुनै चर्चा हुन्न । भुईं मानिसको भुईं चरित्र । उसलाई मतलब पनि छैन, यस्तो चरित्र भए होस्, नभए नहोस् । चाहे कसैले हत्या गरोस् वा घाइते बनाओस् ।

बहालवालाको त हुने नै भयो । एक जना पूर्व मन्त्रीको चरित्र कैले सुखसँग बाँच्न पाउँदैन । घरिघरि उनको चरित्रको हत्या भइरहन्छ । पछिल्लो पटक एकजना अवकाशप्राप्त अधिकृतले आफ्नो संस्मरणात्मक कृतिमार्फत उनको चरित्रको हत्या गरिदिएछन् । उनी दुखी थिए ।

उनी पटक पटक सत्तामा पुगेका थिए । सत्ता जोगाउन सुरा, सुन्दरी र पैसाको छेलोखेलो गरेको आरोप लागेको थियो । नेपालका एक नम्बर भ्रष्टाचारी घोषित गर्दै उनको पुतला दहन भएको थियो । त्यतिबेला पनि उनले चरित्र हत्या भएको दुखेसो गरेका थिए । उनको चरित्रको चरित्र बडो विचित्र लाग्छ ।जो पनि उनको चरित्र हत्या गर्न उद्यत रहन्छन्। यहाँसम्म कि पोहर सुन तस्करीको राष्ट्रिय प्रसङ्ग चल्दा कारागारमा रहेका तस्करले पनि उनको चरित्र हत्या गरिदिए । मानौँ, उनको चरित्र चरित्र होइन, दन्त्यकथाको त्यस्तो राक्षस हो जो पटक पटक मारिन्छ । पुन ः पुनः जीवित भइरहन्छ ।

मलाई उनको चरित्रको माया लाग्यो । विचरा कति मारिनु ? आफ्नो चरित्र जति मारिए पनि उनी एकआध दिन कराउँथे । एक पटक उनको चरित्रको सडकदेखि सदनसम्म हत्या भयो । पहिले मन्त्री भएका थिए । त्यसपछि उपप्रधानमन्त्री भए ।चरित्र हत्या यिनलाई फाप्यो । अब अलि गतिलो खालको चरित्र हत्या भयो भने प्रधानमन्त्री हुन बेर छैन । उनले यस्तो गतिलो चरित्रको आपूर्ति कसरी कहाँबाट गर्दा हुन् कुन्नि ।

हालसालै एक जना सांसदको चरित्र हत्या भयो । पहिले पनि भइराखेकै थियो । तर यस पटक उनकी प्रेमिकाले चरित्र हत्या गरिदिइन् । मामला कानुनी तहमा पुग्यो । सयौँ काण्डमा यिनको चरित्रको सयौँ पटक हत्या भएको थियो । के यिनी बिनाचरित्र बाँचिरहेका थिए । बिना चरित्रकै मानिसलाई जनताले आफ्ना प्रतिनिधि किन चुने ? के जनता चरित्रहीनबाट शासित हुन चाहन्छन् ।

यसरी नै उत्पातसँग जनप्रतिनिधिहरूको चरित्रको हत्या हुँदै जाने हो भने चरित्रको खडेरी पर्ने संभावना बढदै जान्छ । भ्रष्ट मुलुक भनेर चिनिन्थ्यो, कतै अब चरित्रहीनहरूबाट शासित देश भनेर चिनिने त होइन ? पीर पर्नु स्वभाविक हो । के गर्ने त अब ?

हरेक समस्याको समाधान गर्ने हाम्रो मौलित तौरतरिका छ । एउटा ऐन बनाइदिने । अर्को आयोग बनाइदिने । मन्त्रिपरिषद्ले गरेका जस्तोसुकै देश र जनताघाती निर्णय गरे पनि कानुनले सजाय गर्न सक्दैन, त्यस्तै खालको गतिलो ऐन बनाएर चरित्रको संरक्षण गर्ने । अर्को हो, आयोग गठन गर्ने । चरित्र संरक्षण आयोग जसले सार्वजनिक पद धारण गर्ने व्यक्तिहरूको चरित्र मजबुतीका साथ त्यसरी नै संरक्षण गरिदेओस् । जसरी भ्रष्टाचार निर्मूल गर्ने सँस्थाले उनीहरूको संरक्षण गरिदिँदै आएको छ ।
मलाई विश्वास छ- सरकारले यी दुवै काम तदारुकतासाथ चाँडै सम्पन्न गर्नेछ ।

०००
काठमाडौं
फित्कौली द्वैमासिक पूर्णाङ्क- ४१, २०८० (वैशाख-जेठ) 

इलस्ट्रेसन : टङ्क बहादुर आले, उदयपुर