नेपाली हास्यव्यङ्ग्य अनलाइन पत्रिका

योगीश कृष्ण :

प्रत्येक नेपाली नागरिक र्झैँ मलाई पनि के थाहा छ भने देश बर्बाद भैसक्यो,। सबैतिर खत्तम छ । देशलाई सुधार्न मुश्किल छ । असंभव भने छैन । कसरी संभव छ त ? मैले मुलुक सञ्चालन गरे भने मुलुक सुध्रिन संभव छ । यसअघि मैले मुलुक सञ्चालन गर्ने इच्छा गरेकै थिइँन । यता निर्वाचन आयोगमा दिनहुँ दल दर्ता भइरहेको समाचार सुनेपछि मनले मानेन । अब चुप लाग्नु हुन्न, देशका लागि केही गर्नै पर्छ । त्यसैले मैले पनि एउटा दल गठन गर्ने निर्णय गरेँ ।

दलको प्रस्तावना
हामी कुनै विशेष अध्ययन, दक्षता, सीप नभएका, गफाडी एवम् अवसरवादी चरित्रका सर्वंश्रेष्ठ नेपाली नागरिकहरू जनता र देशसेवाका नाममा निजी स्वार्थ पूरा गर्न हाम्रो इतिहास, हाम्रो राजनीतिक संस्कार, विगतका उच्चतम् अभ्यासहरूको सम्मान गर्दै एउटा दल निर्माण गर्न प्रतिबद्ध छौँ ।

दलको नीति
– जसरी भए पनि सत्तामा जाने ।
– केन्द्रदेखि स्थानीय तहसम्मका राजनीतिक पदलाई आ–आफ्‌नो जायजेथा बढाउने साधन बनाउने ।
– आफ्‌नो आर्यआर्जनप्रति कसैलाई जवाफ दिन जरुरी नठान्ने ।
– दलको मञ्जुरी वेगर वा हाम्रो चित्त नबुझाई गरेको हरेक आर्थिक क्रियाकलापलाई गैरकानुनी मान्ने छौँ ।
– उपरिलिखित कार्य संपादन गर्न आवश्यक परे जस्तोसुकै आपराधिक कर्मलाई गैरकानुनी मानिने छैन ।
– जनताका लागि, जनताको हित, मुलुकको स्वार्थ आदि पदावली पल पलमा प्रयोग गरिने छ ।

दलको विधान
धारा १ दलको नाम : अवसरवादी भ्रष्टाचारवादी दल

धारा २ उद्देश्य
२. १ जुनसुकै अवस्थामा सत्तामा सहभागी हुने ।
२. २ भ्रष्टाचार र विधिविहीनतालाई आधुनिकीकरण गरेर अग्रगामी छलाङ मार्ने ।

धारा ३ दलको संरचना
३. १ केन्द्र, प्रदेश, जिल्ला, नगर, गाउँ तहसम्म र विदेशका ती देशहरू जहाँबाट बढी चन्दा आउने संभावना छ त्यहाँ संगठन निर्माण गरिने छ ।

धारा ४ सदस्यता
४ .१ सदस्यताका प्रकार
क. सम्माननीय सदस्य –
यस प्रकारको सदस्यता भ्रष्टाचार वा अन्य आपराधिक कार्यमा सजाय भोगेको वा आरोप लागेको व्यक्तिलाई प्रदान गरिने छ । अझ अन्तर्राष्ट्रिय तहमै यस्ता सुकर्म गरेकालाई प्राथमिकतामा दिइने छ । उनीहरूलाई दलको स्कूल विभाग एवम् प्रशिक्षण विभाग, आर्थिक विभागको नेतृत्व गर्ने अवसर दिइने छ ।

ख. विशिष्ट सदस्य –
दलका माथिल्लो तहका नेताहरूका पारिवारिक सदस्य, ससुराली खलक, भ्रष्टाचारबाट प्राप्त धनको व्यवस्थापन गरिदिने मित्र आदिलाई यस प्रकारको सदस्यता दिइनेछ ।

ग. सदस्यताका लागि न्यूनतम योग्यता
– नानाथरिका उखान टुक्का सुनाउन सक्ने, हावादारी गफ दिन सक्ने,
– केही नगर्नुलाई नै काम हो भनेर परिभाषित गर्ने ल्याकत भएका,
– पार्टीका नाममा चन्दा उठाएर सानो भाग आफू खाने ठूलो भाग नेताकहाँ पुर्‍याउने,
– नेतापत्नीलाई भाउजूको नाता लगाएर चाकडी गर्न सक्ने,
– जनविरोधी सबै कामलाई क्रान्तिकै अङ्ग हो भनेर लिँडेढिपी गर्न सक्ने ।
– विधिको शासन, सच्चरित्रता, निष्ठा एवम् सुकर्मप्रति विश्वास नगर्ने ।

धारा ५ नेतृत्व चयन
क. दलका अध्यक्षले इच्छा गरेमात्र अधिवेशन गरिने छ ।
ख. अधिवेशनले अनिवार्य रूपले अध्यक्षलाई सर्वसम्मत रूपले अध्यक्ष चयन गर्नुपर्ने छ ।
ग. अध्यक्षले अधिवेशन शुरु भन्नासाथ अधिवेशन आरम्भ भएको मान्नुपर्ने छ । अधिवेशन समाप्त भन्नासाथ अधिवेशन समाप्त भएको मान्नु पर्नेछ ।
घ. अध्यक्षले गोजीबाट पर्चा निकालेर लिएको नाम सर्वसम्मतबाट पदाधिकारी चयन भएको मान्नु पर्नेछ।

धारा ६ बैठक र निर्णय
क. अध्यक्षको इच्छा अनुसार बैठक बोलाइने छ ।
ख. बैठक कालोबजारी, तस्कर, विभिन्न आर्थिक अपराधीको बङ्गला, रिसोर्ट, होटल जुनसुकै स्थानमा हुन सक्छ ।
ग. छलफल र निर्णय अध्यक्षले बैठकको निर्णय सुनाएपछि छलफल आरम्भ हुनेछ । निर्णयलाई कुनै प्रतिकूल प्रभाव पार्ने गरी छलफल हुने. छैन ।

धारा ७ दलको आर्थिक स्रोत
क. हाम्रा विशिष्ट सदस्यहरूको योजना अनुसार अर्थ संकलन गरिने छ ।
ख. विभिन्न राजनीतिक एवम् अन्य उच्च पदहरूको बिक्री वितरणबाट प्राप्त रकम ।

धारा ८ अनुशासन
क. इमान्दारिता, देशभक्ति, निष्ठाको राजनीति गर्नु भनेको दलको नीति विरुद्ध मानिने छ ।
ख. नेताले जस्तोसुकै कुकर्म गरे पनि त्यसको समर्थन गर्नु पर्नेछ ।
ग. आ–आफ्‌नो तहमा भ्रष्टाचार बढाउन सक्रिय रहनुपर्छ ।

नोट उपरिखित काम गर्न नसक्नुलाई अनुशासनहीनता मानिने छ र त्यस्ता सदस्य कारवाहीका भागीदार हुने छन् ।

परिशिष्ठ १
दलको नारा भ्रष्टाचार समृद्धिको आधार

परिशिष्ठ २ दलको झण्डा
झण्डाको चारैकिनारमा विभिन्न देशका मुद्राको चित्र अंकित भएको हुनेछ । झण्डामा निलो, रातो, हरियो, गेरु रङका प्रयोग गरिनेछ ।

०००
काठमाडाैं