नेपाली हास्यव्यङ्ग्य अनलाइन पत्रिका

जेन काइजेन :

झाेलानाथ हस्याङ फस्याङ गर्दै ढोका ढक्ढकाउन आइपुग्यो । छाला फुट्ला जस्तो गर्मीमा बत्ति पनि चैट । अनि यसो लुङ्गी कसेर झकाउन मात्र के थालेको थिएँ, ठूलै समस्या आएझैं  झोला करायो, ‘माडसाप्, माड्साप’ भन्दै । एकछिन त म अन्ठाएर जाला कि भनेर बसें । तर कालको खैँजो किन जान्थ्यो, आखिरमा ढोका नखोली भएन । मलाई देख्नासाथ उसले बडाे जतनसँग प्लास्टिकको झोलामा हालिएको केहि पाना अगाडि बढायो र भन्यो, ‘यो साह्रै महत्वपूर्ण दस्ताबेज, हजुरले बाचन गरिबक्सेदेखुन् मेरा पनि यी कान पवित्र हुन्थे ।’

‘यो राती नै पढेर बिताइहाल्न पर्ने चैं के छ ? तपाईं पनि हदै गर्नुहुन्छ । आफैँ पढे हुन्नथ्यो त ?’ म अलिक कसिएरै कराएँछु । आवाजका चापले लुङ्गीको गाँठो नै खुकुलियो । मलाई थाहा थ्यो साला झोले कालो अक्षर भैँसी बराबर भन्ने । तैपनि नेताकहाँ चाकरी पूजा गराउन पर्दा उसैलाई अघि लाउन परिगो त । अनि त्यो पोको फोएर पढ्न थालेँ ।

कमरेड मित्रहरु,
आज हाम्रो प्रभावशाली पार्टी ऐतिहासिक संकटमा परेको कुरा यहाँहरुलाई भनिरहन परेन । यो संकटका पछाडि राष्ट्रिय र अन्तर्राष्ट्रिय दोखहरु स्पष्ट रुपमा देखिएका छन् । ती दोखहरुलाई धूलो चटाउन अनि पार्टी र देशलाई यस संकटबाट मुक्त गराउनका लागि हामीले कठोर रुपमा अघि बढ्न पर्ने समय आएको छ । यो संकट तारण गर्न तुरुन्त लागु गर्न पर्ने केहि सूत्रहरु म यहाँ बाचन गर्न गैरहेको छु । यसलाई तपाईं पार्टी पङ्क्तिका सबै साथीहरुले उच्च मनोबलका साथ जनजनमा पुर्‍याउन पर्ने छ । यी आकस्मिक बैतरणी मन्त्रहरु कण्ठ पारेर छातिमा राखेर हिँड्न पर्ने छ । हरेक नागरिकलाई समृद्दिको शिखरमा पुर्‍याउने हाम्रो लक्ष्य भएको हुँदा यहि समृद्दि मार्गमा आउन सबैलाई आव्हान गर्नुपर्छ । सुन्नोस् राम्रोसँग : कुमार्गमा जानबाट रोक्ने, नमान्नेलाई ठोक्ने । ल ध्यान यता है त ।

१. देशलाई परनिर्भरताबाट जोगाउन एक परिवार एक भैँसीको अवधारणा ल्याउने । यसबाट स्वरोजगार साथै मानव विकासका लागि चाहिने सम्पूर्ण पौष्टिक पदार्थको कमी हुने छैन । मलखादका लागि कसैको मुख ताक्नुपर्ने छैन । हामीलाई हरेक कुरा अर्गानिक प्राप्त हुनेछ र यहाँ उत्पादित बस्तु किन्न विदेशी मुलुकहरुबिचमा होडवाजी लाग्नेछ । स्वदेशी मलखाद र बिउविजनको प्रयोग गर्नाले हामी कति मुद्रा वचत गरेर कति प्रतिशतले वैदेशिक व्यापार बढाउनेछौँ भन्ने कुराको तपाईंहरु अनमान लगाउन पनि असमर्थ हुनुहुनेछ ।

२. देशमा त्यतिका भैंसी भैसकेपछि तिनका छोरा राँगाहरु पनि प्रशस्त हुने नै भए । हो ती राँगाहरु रिटायर भएर बधशाला नजाउन्जेलसम्म तिनलाई यातायात र कृषिकार्यमा प्रयोग गरिनेछ । यसो गर्दा प्रदूषणमुक्त मुलुक हेर्न र राँगागाढाको मजा लिन विदेशीहरुको भीड लाग्नेछ । अब त्यो भीडलाई हामी त्यहि राँगाको शिकार र गोबरमलमा उत्पादित अन्न तथा सागसब्जी ख्वाएर पल्काउन सक्छौँ । अब दुग्धजन्य पदार्थको उत्पादन र खपतले हामी कहाँ पुग्छौँ पुग्छौँ । शत्रुहरुले यसलाई ढुंगे युगमा फर्कायो भन्लान् तर यो समयको माग हो र हाम्रो चलाखी पनि हो विश्वलाई परास्त गर्ने ।

३. त्यसपछि हामीले रोजगारको कुनै चिन्ता लिनै पर्दैन । हरेक मान्छे कि भैँसीको कुँडो पकाउन, कि भैँसी चराउन वा दुहुनमा व्यस्त रहनेछ । त्यसैगरी कोहि विदेशी घुमाउनमा, कोहि होटलमा हुने छ । सबै ब्यस्त जिन्दगी मस्त हुनेछ ।

४. अहिलेको अव्यवहारिक र मुढे शिक्षालाई पूर्ण रुपमा निषेध गरेर कृषिमा आधारित पर्यटन, यातायात र व्यापारको शिक्षा दिइनेछ । अहिलेका सम्पूर्णर शिक्षालयलाई विविध तालिम केन्द्रमा परिणत गरी हरेक नागरिकलाई रुचि अनुसारको उचित तालिम दिइनेछ ।

५. बाहिरिया अस्वस्थ खानेकुराको अत्याधिक प्रयोगबाट उत्सर्जित आजकालका महामारीजन्य सुगर, प्रेसर जस्ता रोगहरु हम्रो व्यवस्थित र सुधारिएको खानपान प्रणालीले गर्दा आफैं निर्मूल भएर जानेछन् । त्यसपछि सबै अस्पतालहरुलाई हामी बाख्रा तथा कुखुरा पालन केन्द्रमा परिणत गरेर अर्को आर्थिक तथा सामाजिक क्रान्ति गर्न सक्नेछौँ ।

६. समय बदलिरहने र आजको अवस्था भोलि नरहने भएकोले अहिलेका उल्झनपूर्ण सम्पूर्ण कानूनहरु र कानूनको जड संविधानलाई समेत विस्थापन गरी आवश्यकता अनुसार मौखिक कानूनी व्यवस्था गरिनेछ । यसले गर्दा सम्पूर्ण कानूनी झमेलाको अन्त्य हुनगई छिटो छरितो न्याय सम्पादन हुने कुरामा हामीले विश्वास राख्नु जरुरी छ ।

७. र अन्त्यमा सम्पूर्ण सामाजिक तथा मनोवैज्ञानिक समस्याको मुहान इन्टरनेट र मोवायल फोन भएकोले यसमा पूर्ण प्रतिवन्ध लगाइ टोलटोलमा साँझको बखत मनोरञ्जनका लागि निःशुल्क टिभी राखिनेछ । यसमा आउने एकमात्र कृषि कार्यक्रम हेर्न सबैलाई प्रोत्साहित गरिनेछ ।

८. सम्पूर्ण पत्रकारिता, सिनेमा, स्कुल, अस्पताल र विश्वविद्यालय जस्ता अन्य सबै मान्छे अल्मल्याउने अनुत्पादक क्षेत्रका जनशक्तिलाई समेत पकेट क्षेत्र तोकेर सामूहिक भैँसी स्याहार केन्द्रमा रोजगार दिइनेछ ।

९. वैदेशिक अध्ययन यात्रालाई पूर्ण रुपमा निषेध गरी बैदेशिक रोजगार नीतिलाई सहज तुल्याइनेछ । अहिलेका मेनपावर खारेज गरी सोझै सरकारी निकायबाटै सशुल्क रोजगारी मिलाइनेछ ।

यी माथि उल्लेखित प्रमुख बुँदाहरुले देशको रोजगार, शिक्षा, स्वास्थ्य, यातायात, सन्चार र व्यापार नीतिलाई सम्बृद्दितर्फ धकेल्ने कुरामा दुईमत छैन । र दोश्रो मतको कुरा जसले गर्छ, त्यसलाई कुमार्गमा जानबाट रोक्ने, नमान्नेलाई ठोक्ने सूत्र प्रयोग गर्न तमाम कार्यकर्ताहरुलाई निर्देशित गर्दछु । र बाँकी झिना मसिना कुरा हामी मिलाउँदै जानेछौँ । अन्य व्यवस्थापन मिलाउन सघाउ पुर्‍याउने उद्देश्यले एक सर्वशक्तिमान आयोग गठन गरिनेछ । यसै आयोगले सार्वजनिक सुनुवाइ गरी जनसाधारणको राय निरन्तर संकलन गर्नेछ । आयोगको अध्यक्ष आजीवन पार्टी अध्यक्ष नै रहनुहुनेछ । र जताबाट जेसुकै राय आए पनि निणर्य आदरणीय अध्यक्षज्यूकै हुनेछ ।
जय देश जय देश ।

यति सुनेपछि झोले ङिच्च हाँस्यो । अनि मलाई सोध्यो, ‘अब के क्षमता छ मलाई भन्नू । बुर्जुवा शिक्षाको काम छैन । बरु राय सुझाव संकलन टोलीको एरिया कमाण्डर बनाउन शिफारिस गरिदिउँला । आफ्नो मान्छे भनेर बेलैमा सुझाव देको छु । खै सय दुई सय ल्याउनू त । दिनभरी आइडिया फोरममा बस्ता बस्ता टेन्स भै’राछ । झ्याप्प हाप हानेर सुतौँ ।

त्यसपछि दुई सय टिपेर झोले हिँड्यो । अब यस्तै आइलाग्ला जस्तो छ । पाटी भनेरै जीवन बिताइयो । दिएको जिम्मेबारी पूरा नि गरिन्छ । बरु देश बनाउने सवालमा तपाईंको सुझाव केहि छन् भने भनिहाल्नू ।

०००
दमक, झापा